S leḥzen d yimeṭṭi ara d-nsiweḍ isalli n tmettant n umeɣnas ameqqran n tmaziɣt d tlelli di Tegzirin Tiknariyin i yeṭṭafaṛen leḥkem n tgelda n Spanya seg lqeṛn 15 ar ass-a. Ladɣa, mass Antonio Cubillo, yefka akk temẓi-s d lǧehd-is netta d amennuɣ ilmend n uslelli n uḥric-a n Tmazɣa, yennuɣ daɣen ilmend n usekfel n tutlayt d yidles amaziɣ n yimezdaɣ igwanciyen(imaziɣen n Tegzirin Tiknariyin). Mass Antonio Cubillo, yemmut ass n letnayen iεeddan di leεmeṛ-is 82 n yiseggasen deg uxxam-is yellan di Tinirif, s sebba n uḥbas n wul-is. Ad t-yeṛḥem Ṛebbi.
Anwa i d Antonio Cubillo?
D yiwen n umeγnas n timuzzeγt d tugdut akked yizerfan n umdan di Tegzirin Tiknariyin. Ilul di temdint n Laguna deg useggas n 1930, yelmed di tesdawit n temdint-a yellan di tegzirt n Tinirif armi i d-yeffeγ d abugaṭu deg useggas n 1956. Asmi yakan i yella d anelmad, yettnaγ γer yidis n yixeddamen d wid akk yettwaḥeqren. Syin, yuγal yeslul-d amussu yessuturen s tmanit n Tegzirin Tiknariyin i yas-d- yewwin taεdawit n udabu n Spenyul. Di tallit-nni, aṭas seg yimdukal-is i yettwaṭṭfen γer lḥebs, ma d netta yerwel. Deg useggas n 1964 yeslul-d amussu-nniḍen, tikkelt-a yessutur s uzarug n Tegzirin-a timaziγin γef tgelda taspenyulit MPAIAC. Iswi agejdan n umussu-ya d: « Timunent n tegzrin, lebni n tmurt εlaḥsab n tumast tamaziγt n yimezdaγ-is Igwanciyen(Guanches) i mazal heddren s tmaziγt ar ass-a ». Antonio Cubillo, yusa-d γer tmurt n Lezzayer deg useggas n 1968. Adabu azzayri n tallit-nni, yeǧǧa-t ad yeqdec s tlelli, yefka-yas yiwet n nnuba di rradyu taγelnawt umi isemma: « La voz de Canarias libre » (Taγect n Teknariyin tilelliyin). Di tallit-nni daγen tettunefk-as tegnit ad yemlil imeγnasen izzayriyen yecban Mouloud Mammeri d Kateb Yacine. Deg useggas n 1978, mbeεd lemsalḥa i d-yellan ger leḥkem n Lezzayer akked win n Spenyul γef temsalt n Sseḥra n Umalu, mass Cubillo yuγal γer tmurt-is. Din wten-t s rsas yiγallen n laman, γas ma tezgel-it tmettant, meεna tiyita i t-iḥuzan teǧǧa-yas-d tirẓi i lebda. Segmi i teḍra twaγit-a, amussu MPAIAC yextar abrid-nniḍen n umennu&gamma,; d amennuγ imselleḥ. Acu kan ḥebsen tilufa deg useggas n 1979, seg yimiren ttnaγen s tin n talwit. Deg useggas n 2003, taγdemt n Spenyul testeεref s lγelṭa i yexdem udabu asmi i yewwet s rsas mass Cubillo. Fkan-as-d leγrama yellan d lḥeq n yidammen-is yuzzlen di lbaṭel, rnan setεerfen s umussu-ines. Ameγnas Antonio Cubillo, yennuɣ armi d asmi i t-tewwi tmettant ilmend n usteεref γef tumast tamaziγt d tlelli n Tegzirin Tiknariyin, am wakken daγen i yeqdec aṭas deg ayen yeεnan asekfel n yidles d amezruy akked tutlayt n ugdud Agwanci Amaziγ.
Mokrane Chikhi