Tura yezri ugar n wayyur segmi i d-rran i yikayaden n BAC, dɣa am akken iban, am deg tal temzizzelt neɣ amsizwer, yella win ɣef ffɣen fell-as yigemmaḍ, sferḥen-t, yella wayeḍ ddan-as di nneqma almi ahat ḥettmen iẓri-is ad yebru i kra n tmiqqwa. Maca tella taluft yewwi-d ad tt-yegzu win ur d-newwi akayad n BAC, annect i yebɣu smeɣren-t uneggaru-a medden. Ddunit ur teḥbis ara kan deg BAC, imi ddunit d iberdan, BAC d yiwen seg-sen. Rnu nwala aṭas i yuysen segmi walan talemmat-nsen tsubb-d seg mraw (10) dɣa ugin ad ɛerḍen tagnit tayeḍ neɣ ad muqlen i ubrid wayeḍ seg yiberdan yuggten n usmures (réussite). Bran i ṭṭbel deg waman netta d ilemẓiyen i llan. Ahawt ddmem-t-id tsersem-t ad yekkaw i tafukt. Ma d kunwi aṭas n teɣbula i ara ad awen-d-nesres deg umagrad-a, fernem war taẓayt, ɣas fernet!
Yelha uɛiwed n BAC.
Tura ma yella i tikkelt tamenzut ay txesrem akayad n BAC ur ilaq ara akk ad yenqes seg-wen ulama d azuḥ n utentuf n lebɣi n uɛiwed, acku tamentilt (tasebbiwt) tamezwarut, ur tettut dakken aɛiwed i useggas ad awen-d-yernu deg tmussni, aya d agejdan. Ɣas ad aken-yawi aseggas wayeḍ seg umdur-nwen yak temẓi d tewẓi. Tasebbiwt nniḍen, d tagnit bac ad t-id-tawim s tezmilt tafellayt, yak am win i d-iɛeddan seg ubrid i yessen yakan, ihi ur yettewɛir ara aṭas ugerrez.
Ɛerdet tibuda (solutions) tiyaḍ.
Ma yella tɛewwlem ur tettɛawadem ara i ukayad n BAC ɣas tzemmrem, llant kra n tamiwin anida tzemmrem ad teɣrem. Yella usudu aɣelnaw n tetiknikin n usensu ed tmerrit (Institut national des techniques hôtelières et touristiques (INTHT). Wayi yella deg Tizi Wezzu akked Tlemsam, yeskaray-d wid ara yesɛun tamussni deg umaḍal n yisensuyen (hôtels) akked tmerrit (tourisme), lxedma tezmer ad tili deg Lezzayer neɣ i berra-is. Tansa ed wuṭṭun n tilifun d wi: abrid Kerrad Racid, Tizi Wezzu. 026 22 62 41.
Yella daɣen, Uɣsur n tetiknikin tatrarin Ibn Rucd
(Etablissement des techniques modernes Ibn Rochd) : yezga-d deg tmanaɣt, Tabatent akked Wehran Alger, Asɣur n tetiknikin tatrarin Ibn Rochd d adeg n usileɣ asadur (formation professionnelle), yesselmad ɣef tsenselkimt (informatique) seg tama n uselḥu akked tutlayin. Wid i d-yewwin neɣ ur d-newwi aBAC zemren ad kecmen deg-s. Uṭṭun n usiwel n win n Lezzayer tamanaɣt: 021 56 32 32.
Ammas aɣelnaw n uselmed asadur seg lebɛid (Centre national d’enseignement professionnel à distance (CNEPD) : ɣas ma iḥettem-iken lḥal ad tbaɛdem seg yiɣerbazen neɣ ur tesɛam akud i tirza-nni, CNEPD d win i izemmren ad awen-yeḍmen aselmed seg lebɛid deg waṭas n taɣulin am ttjara tagreɣlant, tiɣbula talsanin, amaḍal n uḥeffef, atg. Uṭṭun ed wadeg aliktrunan: 021 71 76 94. www.cnepd.org.
Ula d INSIM, Asudu agreɣlan n usefrek (Institut international de management) : yeldi deg Ɛennaba, Lezzayer tamanaɣt, Bgayet, Blida, Bumerdas, Tubiret, Tizi Wezzu, ed waṭas n waɣiren nniḍen. INSIM d asɣur uslig n uselmed, yettwassen s gar wid akk igerrzen deg tmurt. D uzzig deg tussniwin n uselḥu, rnu yesnubgut inelmaden seg 3AS. Tilifun: 034 21 92 77. Wiyi d kra n waqqayen i awen-d-nesken, win inudan ad yaf ugar.
Ula d ANSEJ i walmend-nwen.
Akken teẓram, abehhir amenzu n tnegga taɣelnawt n tallelt i uqeddic n yilemẓiyen (Agence nationale de soutien à l’emploi des jeunes) d aseqdec n yilemẓiyen s ureṭṭal n tedrimt swayes ara yemmag wayen yesɛa yiwen deg ddhen. Ihi, ma yella medlen-d fell-awen tiwwura yiɣerbazen almi i d-teggram fareɣ ccɣel netta tessaramem amahil. Xemmemet s teqey tfernem asenfar ara aken-yezgin tɛerḍem ṭra tagnit-nwen daɣ kunwi. Afud igerrzen!
Mhenni Xalifi