Lwilaya n Tizi-Wezzu teṭṭef amḍiq amenzu deg usefti deg waḥric n uyefki. Annect-a yettased s tebγest n yifellaḥen i yefkan laεtab iman-nsen akken ad-refden aḥric-agi, i wesnarni n tdamsa n tmurt. Maca deg seggasen-agi ineggura, ifellaḥen ttmagaren-d ugguren iwmi ur zmiren-ara, sebba n leγla n yisufar n wučči n lmal naγ lεelf, leγla n dwawi, rnu lexṣaṣ id-yettbanen di ttawilat, am trisiti, amman, ibardan d waṭas niḍen. Γas akken gten wugguren, maca ifellaḥen yettrebin lmal xarṣum wid yeseftayen deg uyefki dduklen afus deg ufus, xelqen-d tiddukliwin akken ad-mεawanen ad-affen tifrat s tdukli i wugguren-agi merra. Si tama niḍen, Tafidiralit n yifellaḥen yettrebin lmal tameqrant « Aksum azeggaγ d uyefki », n lwilaya n Tizi-Wezzu, tesḥasef aṭas γef yiεewiqen d wugguren id-ttmagaren yal ass. Γef aya sutren timliliyin akked yemḍebren taεna temsalt, ad-qqimen wa ad-sqardcen iγeblan s telqay i tifrat-nsen, s wudem yelhan. Tasqamut taγelnawt n tiddukla ifellaḥen izzayriyen, sḥasfen ula d nutni γef iεewiqen-agi id-ttmagaren yal ass ifellaḥen yettrebin lmal n lwilaya n Tizi-Wezzu, imi tugget seg-sen ur-zmiren-ara i taεkkemt, dayen i ideggren kra seg-sen zenzen lmal-nsen. Γer tagara, ifellaḥen yettrebin lmal n lwilaya n Tizi-Wezzu, sutren deg yemḍebren εlayen taεna temsalt, akken ad-ggren iman-nsen i tifrat n wugguren-agi s lεejlan ilfayda usnarni n tdamsa n tmurt
Islam Bessaci