Ahat tura ugar n sa (sebɛa) n yiseggasen segmi tettwajerred deg yisenfaren n tɣiwant. Tamkardit n Ayt Smaɛel atan sebken lecɣal-is s wacḥal d ayyur tura almi qrib tettwattu. Ɣas ma yella, iban dakken, tamkardit-a tettwarǧa aṭas seg tal tama: mačči ala sɣur kra n yilemẓiyen i iḥemmlen taɣuri, wanag, ula seg yisɣuren iɣerbazanen (établissements scolaires) i ara sɛun taɣbalut s wazal-is seg wansi ara d-ssawaḍen idlisen iwatan i yinelmaden. War ma nesha, belli tamkardit ad tili daɣen d aɛwin n Tidukkla Tadelsant Adrar n Fad i yekkaten dima amek ara tessedles ilemẓiyen, ad ten-id-tesker deg tayri n tira akked tɣuri. Mi tettwaserref dayen tedrimt i yellan tettwar-as i tesga, ifares uselway n tɣiwant n Ayt Smaɛel tagnit, mass Ɛebdun Nasir, bac ad yessuter azal n tedrimt tayeḍ deg lwali n Bgayet ass mi d-yerza ɣer tɣiwanin n Yiderginen – Iderginen, Tasexriwt, Ayt Smaɛel – ass n 2 seg yunyu yezrin, swayes ara kemmlen yiqeddicen deg tebnayt-a i yeqqimen akken d tajmamt, skud ala iɣraben d sseqfat i yellan deg-s, umma aql-itt d ilem s tidet. Maca, akken i aɣ-d-tenna teɣbalut-nneɣ, ulac ssmamat i d-yeskanayen dakken ma texḍa taɣiwant n Ayt Smaɛel ad ttwasemmden yiqeddicen n temkarḍit-a.
Mhenni Xalifi