Aẓru d win yesεan amezruy meqren di tmurt n leqbayel, u dwin iwmi fkan azal imezdaγ-is, imi ixxamen n sser d lḥerma ttwabnan s weẓru , s yiwen n lqaleb, d ayen id-yernan cbaḥa meqren i tudrin leqbayel. Lḥirfa n wid yettruẓun aẓru di temnaḍt n leqbayel, ur telli-ara n wass-a, telḥad di seggasen, maca tura tenqes lxedma-agi s waṭas, sebba n laεtab meqqren id-ttmagaren deg-s itarasen, imi zik ttruẓun aẓru s wefḍis d tuẓẓal, dayagi id allalen yellan, rnu aṭas n yemdanen yettruẓun aẓru wexṛen i lḥirfa-agi sebba n waṭan meqqren id-taṭṭafen deg-s, wagi d aṭṭan n yedmaren (la silicose), d aṭṭan i yesrewten acḥal d amdan. Γas akken tawilat n lxedma d wallalen gten tura, am tmacinin, rnu ttawilat i saxdamen i uḥareb γef tezmert-nsen, maca aṭas i irewlen γef lxedma-agi tamentilt yemdanen ur nesaxdam-ara aẓru di lebni, imi yuεar rnu γlay aṭas di ssuma. Macca, ass-a deqs n yemdanen i yesaramen ad-bnun s weẓru, imi yesεa cbaḥa d sser swayes ijebbed tamuγli. Dayen i yeğğan deqs n yemdanen n lwilayat yemgaraden n tmurt n Lzzayer, am Lzzayer tamanaγt, Blida, Tipaza, Wahran, tteqsaden-d timnaḍin-agi n lwilaya n Tizi-Wezzu ger-asent Wizgan, Ifiγa, Iεeẓẓugen, ttaγen aẓru inejren. Si tama niḍen aṭas n yemdanen i yesḥasfen γef wid yettruẓẓun aẓru, imi xelqen-d ugguren meqqren i twenaḍt, am wesyax d wayen niḍen, dayen iyeğğan imsebriden ttkukrun aṭas i uεeddi xarṣum s ṭumubilat, amedya deg webrid n lwilaya uṭun wis 251 i icuden ger snat n tγiwanin, Wizgan akked Yiεeẓẓugen, anda iẓra γellin-d s waṭas, isyaxen sebba n yemdanen yettruẓun mebla tesriḥ, berra lqanun. Akka wa maεdur wa d lḥeq-is, llan yemdanen id-yessasayen amεic-nsen s truẓi n weẓru, acu kkan yewwi-d lḥal akken ad-ḥadren γef tezmert-nsen xarṣum aṭas n yedmaren. Γer tagara akken yeqqar yenzi « Aḥezzeb yugar leqḍaε », yewwi-d lḥal γef yemdanen yettruẓun aẓru, akken ad-harben ama γef tezmert-nsen akken id-yewwi lḥal ad-ḥarben γef twenaḍt d wayen id as-d-yezzin.
Islam Bessaci