Segmi nuḥent tkeryas s waṭas, simmal zerrin yiseggasen, yerna yettimɣur daɣen umḍan n yisehwa (accidents) deg yiberdan, adabu n tmurt n Lezzayer, am tmura merra, yewfa iman-is yettwaḥettem ad yessiwɛir seg tikkelt ɣer tayeḍ angal (code) n tikli, neɣ asaḍuf n ubrid. Maca deg yisuḍaf-a, aṭas i yettwalin « tuccḍiwin », i d-yettbinen akken nniḍen. Amedya, ma nebda seg tama n winna i iɣerrmen kra n win inehhren netta yesker. Deg useggas n 2004, yeffeɣ-d usaḍuf i iḥessben amdan yesker mara yili yiɣisem (alcool) yeṭṭef deg yidammen 0.1 %. Annect-a yella iga-d agnu (problème) d ageɛmir, acku tikwal ad yili unehhar yeswa kan iɣi neɣ d ikkil ad yali yiɣisem deg yidammen-is. Dɣa, wid terza taluft n tɛessast ad sḥebsen anehhar-nni rnu ad yettwaɣerrem, netta ur yeswi iɣisem. Rnu daɣen, deg ddeqs n tegnatin, ad yettwasseḥbes unehhar, ad t-awin ad as-sɛeddin idammen ad yeǧǧ iqeddicen-is, ɣer taggara ad d-iban dakken d amelsi (innocent) i yella. Ɣef waya, adabu imuqel deg usaḍuf-a, ireqqaɛ-it 6 n yiseggasen tura ɣer deffir, yettusemma deg 2009. Yuɣal unehhar yettwaḥbas deg waddad n uskar ala ma iɛedda yiɣisem deg yidammen-is 0.2%. Maca daɣen, imsulta sseqdacen tura amris (appareil) n uktil n yiɣisem, mu ssawalen s tefransist l’alcootest, i izemren ad yesɛeddi idammen n unehhar netta deg tkerrust-is i yella. Seg tama nniḍen, yella usaḍuf wayeḍ i yessefqiɛen inehharen; win igedlen aseqdec n wallalen n teywalt (moyens de communication) deg tnehra. Neẓra dakken asaḍuf-a yeffeɣ-d deg useggas n 2004, seg wass-nni aṭas n yisteqsiyen i d-yesnulfan, gar-asen: amek asiwel kečč tnehhreḍ megdul, ma d awali n usaru uhu? Hata ukerris neɣ ad d-nini tuccḍa i as-d-yettwassuksen i usaḍuf-a n ubrid, ladɣa mi yettbin ɛinani belli d asaru i izemren ad yessufeɣ anehhar seg leɛqel-is wala asawal. Ɣas ar tura mačči akk tikeryas sɛant tawuri-ya n tiliẓri, maca sey-a ɣer sdat ilaq ad muqqlen yinesdabuyen (autorités) amek ad ẓerren ma yella anehhar-a yettmuqul asaru neɣ uhu. Deg wannect-a, neɛreḍ ad d-nefser kra n waqqayen (points) ɣef usaḍuf n ubrid, ɣas ma yella isehwa (accidents), ad yeqqim umdan d netta i d amassay (responsable) amezwaru fell-asen.
Mhenni Xalifi