Teḍra-d rreḥba taɣelnawt tis7 n lḥirfat tiqburin seg 18 ar 23 deg waggur-agi i deg-i nella. Timlilit i d-ihegga useqqamu aɣerfan akked texxam n lḥirfan n lwilaya n Tizi Uzzu, tella-d deg umraḥ ‘’Colonel Mohend Oulhadj’’ n temdint n Tizi Uzzu.
Ugar n 150 n yimdanen i d-yusan deg 36 n lwilayat i ittekkin deg temsikent-a. Ussan-d seg usamar am Qsnṭina, deg umalu am Wehran, deg unẓul am Tmenɣast mebla ma nettu lwilayat n ugafa, Tizi Uzzu, Bgayet, Blida, Lezzayer…atg
Ma ɣef yiswiyen n rreḥba-a, yenna-d Mass BERKI Abdelkrim, anemhal n texxam n lḥirfat n Tizi Uzzu : ‘’iswi amezwaru yeɛna tadamsa. I wakken ad tdum lḥirfa, ilaq bab-is ad yesnuzu ayen ixeddem. Tagi d tamezwarut. Tis snat, nefka tagnit i yinaẓuren i wakken ad mlilen u ad myussanen gar-asen. Ad mmeslayen ɣef wuguren-nsen akked tifrat i zemren ara yilin sya d afella. Tis tlata, d taswiɛt, diɣ, i yimezdaɣ i wakken ad issinen taẓuri n tmurt n lezzayer akken tella.’’
Nnan-d wiyaḍ :
Tiddukla n tlawin n tuddar : “d ayen yelhan. D taswiɛt anda ara nefk azal i leqdic n tlawin n tuddar xas ma ur d-yelli ara usnuzu s waṭas.
Imeḥbas n Tizi Uzzu : taẓuri-agi, yesnulfa-tt-id yiwen daxel n lḥebs, syin nesselmed-itt i wiyaḍ. Akka tura aṭas i tt-ixeddem. Idrimen n wayen yenzan, yettawi-ten bab-is”
Yiwen seg Biskra : “ imezdaɣ n tmurt n leqbayel, tturebban dayen kan. D tikkelt tamezwarut i d-usiɣ ɣer da, dayen igerrzen”
Qsenṭina : “tanemmirt i yimḍebbren akked yimezdaɣ n Tizi Uzzu i aɣ-yessereḥben akken iwulem”
Ɣardaya : “nekk, uɣaɣ tanummi dagi. Ttekkiɣ deg yal rreḥba. Uɣaleɣ d Aqbayli. Zureɣ-d akked tudrin n leqbayel.”
Busɛada : “yelha, ad nemyussan gar-aneɣ. Acu kan ixus ciṭ deg uheggi-agi. Imdanen ur d-usin ara s waṭas acku ur slin ara, ahat. “
Adrar : “ciṭ n usnuzu kan i yellan. Tanemmirt i wid i aɣ-d-inecden.“
Tamenɣast : “imezdaɣ n lwilaya n Tizi Uzzu, ḥedqen aṭas. Sterḥiben akken ilaq s yinebgawen-nsen. Freḥeɣ imi lliɣ dagi.”
Hocine.M