Accueil Tamazight «Ad kemmleɣ aḥraz n tizlit tazwawt alama mmuteɣ»

Muḥemmed Cami : «Ad kemmleɣ aḥraz n tizlit tazwawt alama mmuteɣ»

2013
- PUBLICITÉ -

Muḥemmed Cami seg yirgazen i yuklalen aṭas n wannuz. Ilul di taddart n Tewrirt n Mimun deg At Yenni aseggas n 1959. Ar tura, amur ameqqran seg tudert-is yefka-tt i uḥraz n tezlit tazwawt (taqbaylit). Dɣa, imi taggara-ya yura-d deg uẓeṭṭa inmetti n faysbuk dakken atan ad yeḥbes afsar n yineɣmisen d tewlafin n yicennayen iqburen, nesteqsa-t ɣef sebba. Tadiwennit!

- PUBLICITÉ -

Aɣmis n Yimaziɣen : Telliḍ tebɣiḍ ad teǧǧeḍ leqdic deg faysbuk, acimi?

Muḥemmed Cami : Axaṭer aṭas n lɣaci i walaɣ ttsemmin tiwlafin i d-xeddmeɣ ttarran-tent ɣef yismawen-nsen, netta ur ilaq ara akk wannect-a, akken qqaren mkul lḥaǧa tesɛa bab-is. Ad ten-id-yehdu Rebbi kan, wamma amezruy ad iched ɣef win igan kra. Leɛtab-iw akk atan di les archives. Nessutur ihi kra n leqder kan.

Aṭas n yinaẓuren i umi turiḍ tibratin akken ad tesɛuḍ ayen xeddmen. Mmeslay-aneɣ cwiṭ ɣef waya…

D tidet. Ahat azal n 150 n tebratin i yellan gar tid uriɣ i yinaẓuren akked tid i yi-d-uran. Am Ccix Nurdin, Muḥand Racid, Yusef n Bgayet (Abǧawi), Ayt Mengellat ed wiyaḍ nniḍen. Wid yemmuten ad ten-yerḥem Rebbi, wiyaḍ s tuɣzi n leɛmer-nsen. Tajmilt i ucennay i yi-iɛawnen aṭas deg uqeddic-iw: wa d Muḥand Racid umi ttmenniɣ ḥellu s uɣsab. 

Acḥal n yiseggasen kečč d asegraw (ajmaɛ) ed wacu tesɛiḍ ar tura?

Seg useggas n  1972 ar tura jemɛeɣ ihi ɛeddan 40 n yiseggasen. Seg wayen xemmleɣ ugar n 6000 n yimagraden n tɣamsa yuran, nnig n 4000 lewsayef yemgerraden n yiḍebsiyen am wid n 45 tours 78 t ed 33 t. Sɛiɣ daɣen  aṭas n yipustiren ed tewlafin deg uxxam. Annect-a, iwakken lǧil i d-iteddun ad issinen amezruy n ccna n tmaziɣt, ad ẓren amek i d-yebda daɣen.

Ar tura mazal ur tufiḍ tallelt (aɛiwen) sɣur ḥedd?

Ulac. Ar tura ur tesɛiḍ win d-yerran i uncad ed tiɣri-inu. Lameɛna nekk mazal ad kemmleɣ ccɣel-iw alama mmuteɣ, ɣas akka la nettwali ulac ulama d tajmilt skud akka nedder, ma nemmut ula iwumi-tt. Ad snemreɣ kan imdukkal n tɣamsa imi nutni ur ssineɣ tatut, akked yimdukkal n faysbuk i yi-d-irennun tabɣest ẓran azal n wayen qqdceɣ. Ẓriɣ lemmer d aḥerraz n tezlit taɛrabt i lliɣ ad iyi-iɛiwnen s tumert. Maca nekk akken yebɣu yili, imi nekk d azwaw ad mmteɣ d ilelli.

Tanemmirt a Muḥemmed, d acu d awal-ik n taggara?

Ssarameɣ teɣzi n tmeddurt i yicennayen-nneɣ n teqbaylit. Afud igerrzen i Uɣmis n Yimaziɣen. Tanemmirt i kečč a mass Mhenni akked widen merra yettnadin ɣef tmaziɣt. Nessaram ad d-tuɣal d tutlayt tunsibt di tmurt-is.

Yesteqsa-t: Mhenni Xalifi

- PUBLICITÉ -