Seg usfuggel n ttiɛad amezray n 8 deg mayu 1945, ideg i d-thegga tuffɣa ɣer taddart n Ayt Felkay, i yeṭṭafaren taɣiwant n Yiderginen, ideg asentel i d-yettwafernen i temlilit, yella «Amezruy ed tgemmi», d tagnit n tidet ass-nni i Tdukkla Asirem Guraya akken ad d-tesbeyyen tadukkli-s akked yimezdaɣ idiganen, daɣen ad teḥrez imeḍqan igerrzen i yellan din: d igamanen, d idelsanen neɣ d imezrayen. Ddeqs ihi n warmuden i yemuggen: am tefsarin n wayen akk icudden i umezruy, asarag ɣef tegrawla, akked yiqeddicen nniḍen i warrac umi i d-yettwahegga umsizwer n wunuɣ (dessin), rnu-yas daɣen yiwet n tuffɣa n waddal d umerreḥ. Ma yella d tameɣra n ugama i d-yellan deffir ttiɛad n Ayt Felkay, deg teɣzi n ddurt, tga tdukkla Asirem Guraya aṭas daɣen n temliliyin deg temnaḍin yemgerraden n waɣir n Bgayet am Takkuct deg Ayt Smaɛel, akked ddeqs n warmuden ed tɣawsiwin s twizi lwaḥi ed tdukkliwin tiyaḍ i ubaɣur n twennaḍt. Ma yella taggara-ya daɣen, tesuddes tdukkla-ya uɣef nettmeslay ttiɛad s wazal-is, d tameɣra n uberquq, neɣ lɛin, deg taddart n Leɛlam, taɣiwant n Temriǧt. Annect-a yella-d s usentel n « Acemma ur t-nesɛi war kra, ad neqdec akalen yeddren ».
Tamnaḍt n Leɛlam tettwassen nezzeh s uberquq-is, daymi tenwa tdukkla-ya Asirem Guraya ad tessissen tiɣenṭert-a s ubrid n ttiɛad-nni ideg tekkant twinas n medden. «Nekkni deg Tidukkla Asirem Guraya nesɛa aɣawas (plan) n yiqeddicen deg teɣzi n yal aseggas s waṭas n leḥsabat ed tezrawt ed ttbut. Yettusemma ayen nferren ad nexdem mačči sres kan war ma neẓra azal-is. Aseggas-a dɣa zemreɣ ad d-iniɣ dakken nesteqnaɛ s wayen nexdem deg setta n wayyuren imenza n useggas-a n 2015. Rnu ad d-iniɣ aseggas-a i nḥerrek ugar cwiṭ ɣef setta n wayyuren imenza n yilindi. Taggara-ya kan, ussan n 15 ed 16 deg yunyu nga yiwen n usileɣ s wazal-is i kra n yilemẓiyen.» i aɣ-d-iberreḥ Ɛemmar Rabḥi, i yellan ɣef uqerru n Tdukkla Asirem Guraya, send ad d-yernu : «Am tal tidukkla nesɛa ula d nekkni ddeqs n yiswan nebɣa ad ten-naweḍ, gar-asen asnerni n waddal s umata d win n udrar s lxusus, aseḥbiber ɣef ugama akked uḥraz n tgemmi (patrimoine) tadelsant, tagamant akked tmezrayt daɣen.» Ma ɣef tallelt i tufa tdukkla sɣur tamiwin yemgerraden, Ɛemmar yenna-d: «akken teẓram nekkni d tidukkla n waɣir, tal tikkelt nesɛa ddeqs n warmuden i yesran i waṭas n yibeddi ed tebɣest. Ɣef waya ad d-iniɣ, ɣas ma nufa kra n tallelt sɣur wa ed wa, ama s udrim, s wallalen neɣ s wawal, maca ilaq ad d-nini dakken mazal txus.» Tidukkla-ya i d-yennulfan deg wayyur n yunyu 2008 atan tettban-d tessef ma neẓra ayen akk txeddem deg wannar. Ula d isenfaren tesɛa tdukkla-ya Asirem Guraya: «tal tikkelt nqeddec ahat ugar n tezmert-nneɣ, maca daɣen nesɛa kra n yisenfaren d imeqqranen sey-a ɣer sdat, ad d-bedreɣ seg-sen : aɣerbaz n tmussni ed ugama akked uxxam yettwabnan n ulbas.» I aɣ-d-yerna win i aɣ-d-yettmeslayen.
Mhenni Xalifi