Nnig n tfaska tamaynut n Tubiret akked umsizwer n temyaɛt s usefru n Tdukkla Lbacir Amellaḥ n Yicekkaben i ara yemaggen, ad d-nesmekti, yiwet seg 26 deg yulyu almi d 30, tayeḍ akken-nni deg unekcum n ɣuct, atan grant-d tiɣri i yiḥeddaden n wawal snat n tamiwin nniḍen ara d-yessudsen timliliyin-a, yiwet d tidukkla tadelsant Smaɛil Azikiw n At Ziki, tayeḍ d taɣiwant n At Wasif s ullethi n Usqamu Unnig n Timmuzɣa ed ugraw n tmeɣriwin n taddart-nni. Aṭuqqet akka n ttiɛadat-a idelsanen yecban annaren-a n usnerni n tmedyezt tazwawt neɣ tamaziɣt akked temlilit war ssuma gar yimedyazen-a at iḥulfan, d ayen yernan, d ayen yelhan almi drus n tigawin i d-yettilin ttmeẓrant s tidet am tigi. Daymi annect-a ur yessecreh ara imedyazen kan i yefudden amlaqi seg winna n Udrar n Fad aya deg meɣres yezrin, maca daɣen ula d tutlayt tezmummeg seg ul mi akken ttwafesrent tiɣriwin, ladɣa, am wakken neẓra akk, mi teḥbes tfaska nniḍen n Tmizar iseggasen-a iɛeddan, i d-yeglan s ddeqs n yisteqsiyen. Tafaska n At Ziki d tajmilt i Smaɛil Azikiw, win yebɣan ad iceyyaɛ isefra-yis i tikkin yella yiznil-a i walmend-nsen s ttawil n internet: [email protected]. Isefra ad ilin tlata d imaynuten, ad ttwaceyyɛen send azemz-a: amenzu n ɣuct 2015. Ad nesselɣu kan wid ara yerzu yisalli, dakken tiɣri i tikkin n Usqamu Unnig n Timmuzɣa akked tɣiwant n At Wasif iɛedda lawan-is n uceyyaɛ n yisefra ass n sed 4 deg yulyu-ya. Timlilit-a d tin umi semman «timezwura n tmedyezt n At Wasif» ad d-tili ussan n 12, 13 akked 14 yulyu 2015, d tajmilt i Lḥaǧ El Muxṭar Ayt Sayd «amedyaz ur neggan». Ma seg tama n yimedyazen mi i ten-nesteqsa ɣef yisiharen-a llan ḥman i tikkin llan smiḍen: «ur ḥsiɣ ara ma ad ttekkiɣ deg umsizwer imi i yi-tt-yekkes wakud. D acu kan zemreɣ ad ḥewseɣ yiwen n wass ad waliɣ imdukkal». I aɣ-d-yenna yiwen n umedyaz.
Mhenni Xalifi