Accueil Tamazight Mmuten yirgazen ur nuklal

Mmuten yirgazen ur nuklal

1744
- PUBLICITÉ -

Qqaren abrid n trugza yuεaṛ aṭas, γef waya tuget n yirgazen regglen fell-as, ttaγen abrid n cmayet imi d abrid-nni i d afessas. Maca, irgazen n trugza am Muḥamed Budyaf d Lwennas Matub, muḥal ddan deg ubrid n cmayet yesburen lεaṛ. Annect-a merra iban-d deg yiseggasen n 90 n lqarn yezrin, imi tamurt n Lezzayer teddar tazγent n tsartit tuεar aṭas, anda yeεreq cced n uyeddid, yuεar laḥsab i tifin, tegdi tezdaγ yal amdan, rrebrab yesqiṭṭiε deg uzal, agdud azzayri yettawi lewhi s wallen anda ara d-ibban urgaz ara d-yarren asirem, d ifadden d tebγest. Lwennas iqubel lwafaε s cna, awal ma ifat yeffeɣ-d deg yimi-s, yecba aɛbar, yeγleb tirṣaṣin. Muḥal yessusem γef tidet, muḥal yedda deg ubrid n lbaṭel, muḥal iεebba azaglu akken i t-ttεebbin wiyaḍ. Yezga d amennuγ γef tmaziγt, γef Lezzayer tagdudant tamagdayt. Yezga iteddu deg ubrid n tidet, deg ubrid n yimaγban imi ibardan-agi suffuγen γer tafat. Syin, yuγal-d niqal rbaḥ tamurt ass n 14 yennayer 1992, yerna-d usirem-nniḍen ara ijebren iγisi yewwten, yuγal-d Muḥamed Budyaf. Lawan-nni, yal tazγunt tettεummu di Lezzayer, imḍebbren n tallit-nni, teffeɣ-asen afus, ggumman ad d-afen abrid ara yessufɣen ɣer tifrat, imi zzhir yuɣ tuddar d temdinin. Dγa, Mohamed Boudiaf yellan yettwanfa mi akken tufrar tagut ɣef tmurt imi tiktiwin-is mgaradent aṭas γef tid n wid yeṭṭfen adabu s yiɣil, yugi leḥkem n leγder, leḥkem n ukabar awḥid, yerra-d i teγri n tmurt-is, yenna dakken talwit d tifrat n tmurt n Lezzayer ad ilint s tugdut. Yewwi-d yid-s amecwar γezzifen, yebda lebni n tmurt γef tidet. 166 n wussan kan iruḥ niqal yerra-d asirem i ugdud azzayri, yerra-d ifadden i yimdanen i ifeclen niqal, yerra-d tayri γer wulawen, yesfeḍ asigna γef tmurt. Maca iεdawen n tmurt akked tudert, zgan εussen di yal amḍiq di yal lawan. Imi, ass n 29 yunyu 1992 γef 11h15, tamurt n Lezzayer yeγli-yas ujgu alemmas, yeγli yiwen n urgaz yesεan azal, yesrafeg usirem, imi Muḥamed Budyaf nγan-t yemcumen di temdint n Σennaba. Amennuγ d win yettkemilen, imi Lwennas, yebges s tidet d tebγes γer umennuγ mgal wid yebγan cwal i tmurt, wid yebγan ad siγen iẓuran n tεarbubt d tneslemt tamṭarfit s rrebrab, wid yebγan ad skecmen tugdi i yizzayriyen, lwennas iquzzem-iten s trugza d yise&gamma,; imi yumen s wayen ixeddem. Maca, iεdawen n tudert, zgan εusen-t azal iḍ, di tallit-nni n rrebrab, tajmaɛt n tegmat n yinselmen, FIS akked GIA, i d-yujwen lhem i tmurt, ḥekmen s lmut γef Lwennas deg useggas n 1992, imi muḥal yeğğa-ten ad xedmen lebγi-nsen, yezga-asen-d am zzarb yuεren. Deg wass 25 n Ctember 1994 yettwaxḍef s yifassen n tegmat n yinsleman, maca 15 n wussan seld aya, serrḥen-as-d imi walan belli agdud aqbayli s umata bedden am yiwen n urgaz, ḥṣan γer yiqerra-nsen i d-teteddu. Maca tikkelt-agi, ur t-zggilen ara, ass n 25 yunyu 1998, ggulen ur ḥniten ad-yemmet, nγan-t yeεdawen n tudert, wid ineqḍen itran deg yigenwan di laεmer-is 42 n yiseggasen. Xas ğğan-aγ yirgazen-agi at lbaḍna, ğğan-aγ-d agerruj ur-netfakka, ayen xedmen d timsirin n tudert, deg-sent i d-nelmed tamussni, deg-sent i d-nugem, nekkes fad, mazal ad neddu deg ubrid-nsen, imi d abrid yessawaḍen srid γer yeswi.

- PUBLICITÉ -

Islam Bessaci

- PUBLICITÉ -