Taɣiwant n At Ɛisa Mimun i d-yezgan deg ugafa n lwilaya n Tizi Uzzu, tebɛed fell-as azal n 15 km. Taɣiwant-agi ideg llant 23 n tudrin, tettwassen s tẓegwa meqqren am umadaɣ n taddart n Uqawej (Budkku) d win n Wat Berahem.
Rnu ɣur-s, d taɣiwant i d-yeğğan aṭas n yinaẓuren yecban : Ali Ferḥati, Muḥend Raḥim, Bellxir Muḥend Aki , Karim Xelfawi d wiyaḍ-nniḍen. Taɣiwant-agi, mazal tettidir iseggasen-agi ineggura lexsas deg waṭas n yiḥricen d yisenfaren yemgaraden n tudert tartar, gar-asen lgaz n temdint.
Ugur-agi n usiweḍ n lgaz n temdint s ixxamen, irennun-d lḥif i yimezdaɣ n 23 n tuddar n tɣiwant-agi. Seg tlemmast n useggas n 2015 i bdan yimuhal n usekcem n lgaz s ixxamen deg kra n tudrin, ma d tudrin-nniḍen kra armi d tura i bdan lecɣal n usekcem-is.
Imezdaɣ n tuddar-agi ṛwan rray-nsen, ladɣa deg tallit n ccetwa, imi acḥal n tikkal i leḥun d likumiṭer i wakken ad d-awin taqerԑet n lgaz, ama d aggefur neɣ d adfel, tikwal ttuɣalen-d ifasen d ilmawen: ulac aṭas n tḥuna i yesnuzun lgaz n tqerεat. D ayen yeğğan imezdaɣ n tɣiwant-a ad d-gren tiɣri, yerna ad suturen deg wid teԑna temsalt gar-asen imeḍberen n tɣiwant At Σisa Mimun, iɣef yella ɣef uqerruy-is Mass Aki Chabane d tenmehla n yimuhal izuyaz (Direction des Travaux public), i wakken ad yili ukemmel n usenfar-a deg ussan-agi kan i d-iteddun. Ar melmi ara tdum akka, taɣiwant n At Σissa Mimun ad teqqim mebla lgaz n temdint?.
Adaoun Abdelghani