Accueil Tamazight Yedda seg wadeg ɣer wayeḍ…

Hamid Abed : Yedda seg wadeg ɣer wayeḍ…

2278
- PUBLICITÉ -

Mačči aṭas n wakud segmi yebda yessefraw, yekcem amaḍal n tmedyezt. Wagi d amedyaz Ḥamid Ɛabed i ilulen ass n 28 seg wayyur n ṭuber aseggas n 1954, deg taddart n Tqerbust, taɣiwant n Aɣbalu. D mmi-s n Tubiret i d-yufan tikci-ines ɣer tmedyezt seld imi yeffeɣ leɛmer n uxeddim, yeḥbes-it dayen. Yella uqbel yettaru seg wacḥal-aya iḍrisen ɣef ddunit d yiɣeblan-is, wanag alami d taggara-a kan i yerra tiɣri i yimru i as-d-yessawlen i usefru. Iruḥ, yeddem-it-id ad yeččar yis-s tiwriqin timellalin s tira taberkant. Ad yesres deg-s ifyar i as-d-tettak tegregt s tallelt n wallaɣ-is. Ad yebnu deg-s tiseddarin s ccbaḥa n wawal iweznen. Ḥamid Ɛabed, d bab n yisefra s tutlayt tafransist, d tin i yefren ad yezwir yis-s tamedyezt-is acku seg zik mi tt-yeɣra yessen-itt, iḥemmel-itt tezdeɣ ul-is, ladɣa tasekla-ines. Aya, ɛlaḥsab ayen i d-yenna. Azal n ukuẓ n leɛwam segmi yura asefru-ines amezwaru. Deg twala n useggas kan yessaweḍ ad d-yejmaɛ xilla, ad d-yessamed ammud. Dɣa, d annect-nni i iga umedyaz Ḥamid Ɛabed, mbeɛd ahat mraw d sin (12) n wayyuren segmi yebda yessefraw, yessufeɣ-d ammud n yisefra sɣur teẓrigin EL AMAL n Tizi Uzzu. D ammud i wumi isemma “Images et sensations», neɣ “Tugniwin d yifrayen”. Deg wammud-nni ad d-naf isefra ɣef ugama, tayri, ddunit, tijmilin i Lwennas Meɛtub, Ḥnifa d wiyaḍ. War ma yettu lasel-is azwaw. Ur yezgil Ḥamid Ɛabed ad yessefru daɣen ɣef tmeṭṭut taqbaylit. Amedyaz-a i yesɛan tura sḍis n tmerwin d sin n yiseggasen (62) deg leɛmer, yegra yekcem ula deg tmedyezt s tutlayt-is tazwawt. Yexdem kra n yisefra s teqbaylit, yeqqar di yiwen seg-sen i wumi yefka azwel “Ur d-yeggri lmenṭeq”: Mačči d aɣfal i neɣfel, mi akka nessusem ur d-nenṭiq. Neɣ ma d alwet i nelwet, d lweqt i qerriḥen am yifelfel. Awal ur as-d-yeggar umḍiq, ma yeggul urgaz yeḥnet,.Yessusem lfahem yerwel, yeqqel umeslay d aɛewwiq, Yekker-d ubhim ad t-yewwet… Akka ihi, Ḥamid Ɛabed ɣas ma yebda tira s tmeslayt tarumit, yesṭuqqet yis-s leqdic-is, lameɛna yusa-d wass ideg yefka amur i tutlayt-is daɣen. Rnu ɣef waya, yenna-d umedyaz-a dakken yettxemmim ma yebɣa Rebbi ad yexdem tasuqqilt i wammud-is. Meḥsub yebɣa ad t-id-yerr seg tefransist ɣer tezwawt. Afud ijehden i Ḥamid Ɛabed deg ccɣel-ines.

- PUBLICITÉ -

Kaïsa Khalifi

- PUBLICITÉ -