Accueil Tamazight Taddart yettwattun!

Ikhelouiène : Taddart yettwattun!

1804
- PUBLICITÉ -

Taddart n Ikhelouiène d yiwet seg 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef temdint-a azal n 15 km. Taddart-agi, mazal ar ass-a n wussan tettidir iseggasen-agi ineggura lexsas d ameqqran, deg yiḥricen d yisenfaren yemgarden n tudert tatrart gar-asen: ttawil n Internet, lgaz n temdint, yir liḥala n yibrdan, asezdeg n twennaḍt, imḍiqen i yilmeẓyen, d uɣbel n waman…

- PUBLICITÉ -

Ssuturen imezdaɣ n taddart-agi n Ikhelouiène deg yimḍebren teεna temsalt, ama d wid n usqamu aɣerfan (APC) n Ait Aissa Mimoun ama d wid n lwilaya n Tizi Uzzu, i wakken ad d-rren lwelha-nsen ɣer yimezdaɣ n taddart-agi yenḥafen aṭas si yal tama. Menbeεd mi ttidiren akka tura deg tegnatin qessihen. Alaḥsab n yimezdaɣ-is, nnan-d d akken taddart-agi si zik tettwaεzel, yerna mazal ar tura tettwaεzel; acku ulac tadrimt yettwaxesen i yisenfaren n unegmu i lfayda n taddart-agi ara yessifsusen taεkumt ɣef tudert-nsen.. Ma d iɣeblan i d-ttmagaren yal ass, ad naf deg tazwara aɣbel n waman n tisit, imi ufan-d iman-nsen ttnadin ɣef tiqit n waman anida ara tt-id-awin. Acku ttɣaman 15 neɣ 20 n wussan i wakken ad d-uɣalen waman yiwen ubrid, d ayen iten-yeğğan ad d-aɣen tisitirin n waman. Anect-a, yegla-d s uɣlaq n tkebbanit n Lezzayer i Waman (ADE) n tama n Wagennun i wazal n ddurt sɣur imezdaɣ n taddart-agi deg ussan iεeddan. Ugur wis sin, d Internet, mazal ur yefri ara. Ma yebɣa yiwen ad yazen neɣ ad d-yawi kra seg Internet, ilaq fell-as ad yerzu arma d tamdint n Tizi Uzzu. Ay-agi, yebɣa ad d-yini d akken ilaq ad ilḥu 15 km, neɣ yezmer lḥal ad isruḥ yiwen wass, ɣef liğal n ssaεa. Maca lukan i d-tewwiḍ s ixxamen tili mačči akka. Cetkayen, daɣen, ɣef uεeṭṭel n uṣiweḍ n lgaz n temdint s ixxamen-nsen,; imi ṛwan lḥif ladɣa deg tesmhuyt n tegrest, neɣ deg ussan n ccetwa, imi acḥal n tikkal i leḥḥun d likumiṭer i wakken ad d-awin taqqerԑat n lgaz, uɣur ara sewwen neɣ uɣur ara seḥmun. D ayen i ten-yeğğan ad d-gren tiɣri yerna ad ssuturen deg wid teԑna temsalt gar-asen imeḍberen n tɣiwant Ayt Σissa Mimun, d Tanmehla n Imuhal Izuyaz (Direction des Travaux public), i wakken ad yefru wugura-a deg wussan i d-iteddun. Aɣbel wis ukuẓ, d win n yiberdan; imi aṭas n yiberdan yellan deg taddart-agi, ha-ten-an deg yir liḥala, yecban abrid ameqqran yeqqnen gar-as d Laԑzib n Ugni n Σmer, rnu ɣur-s abrid yellan daxel n taddart.

Aḥric n tedwest d ṣṣeḥa (la santé) d win yenxesen ugar n yiḥricenn-niḍen imi axxam n tujjya Muḥamed Saεil n Tala Illillan, ur yesԑi ara aṭas n ttawilat n udawi, yerna ur yesԑi ara takkerust n tujjya (ambulance) ara yettawin imuḍan. Yerna ula netta iḥuza-t uɣbel-nni n waman, imi ur yesεi ara tisitirin ideg ara yejmeε aman, aṭas n tikkal i yettɣama mebla aman.

D annect-agi akk n yiɣeblan i yerran tudert n twaculin n taddart n Ikhelouiène, ttidirent deg lḥif d lmeḥna, ɣef waya ssuturent deg yimḍebren ad d-lhin deg wuguren iceɣben allaɣ-nsen, u ad d-afen tifrat i yiɣeblan s tazzla.

Adaoun Abdelghani

- PUBLICITÉ -