Accueil Tamazight «A win yufan ayen ndir ad d-nini diri-t …»

Nabila Haliche : «A win yufan ayen ndir ad d-nini diri-t …»

2846
- PUBLICITÉ -

Nabila Haliche d tamyurart n umezgun, d tamedyazt am waken tettaru, diɣ, isura. S lferḥ I d aɣ-d-terra ɣef yisteqsiyen-nneɣ.

- PUBLICITÉ -

Aɣmis n yimaziɣen: D acu-t umezgun ɣur-m?

Nabila Haliche: amezgun ɣur-i, d tirmit yelhan, yesɛan azal d ameqqran i d-yewwi ad t-yissin yal amdan. Imi amezgun mačči kan yejmaɛ akk taẓuri s yisenfan-is yemxalafen: ccna, aẓawan, tamedyazt… Imi daɣen d tagnit yessufuɣen azeffan si tirga n tira ɣer tidet n ddunit anda yezmer ad iserreḥ i yiman-is, ad yessufeɣ ayen akk yellan deg wallaɣ-is d wayen akk yejmaɛ wul-is, akken ad t-walin medden, ad t-issinen. Amezgun, d tamussni wessiɛen lqayen, deg-s ddukkulen taḍsa d yimeṭṭi, leɛyaḍ d tsusmi. D win i d-yettawin awal ɣef kra yellan d tadyant, tasertit, tayri, d wayen akk iḍerrun. Ula d ayen yeḍran deg yizri iɛeddan nezmar ad t-id-neḥyu s tceqqufin n umezgun. Amezgun, ur yettwaktab akken ad t-ɣren madden, yettwaktab akken ad t-uraren, imi yal taceqquft tesɛa tabraṭt neɣ izen ilaq uzeffan ad t-yessiweḍ i yimferǧen. Amezgun, d abrid yessawaḍen tamussni seg umdan ɣer wayeḍ, neɣ seg uzeffan ɣer yimferǧen. Nezmer ad d-nini amezgun d lemri n tugdut .

War ccekk urar n umezgun mačči d ayen isehlen, amek ilaq ad d-ibin uzeffan sdat-s n yimferǧen-ines ?

D tidet! Urar n umezgun mačči d ayen isehlen maḍi, imi yettḥettim ɣef uzeffan ad yeffeɣ akk seg yiman-is, seg tudert-is I wakken ad ibeggen tudert n wiyaḍ. Yeḥwaǧ aṭas n usfuggel (la concentration). Uqbel ad yeffeɣ ɣer yimferǧen, ilaq ad yili yettkalay ɣef yiman-is, yumen s wayen ixeddem, ad iheggi iman-is akken iwata lḥal am wakken ad yali ɣef usayes(sur scène). Ur ilaq ara ad iḥulfu s yimferǧen i as-d-yezzin. Di lmux-is, ilaq ad yili d awḥid akken ur t-yettaṭaf ara lxuf. Yewwi-d, ad yili d afessas ur nettɛawad kan i umeslay, ad yeqfiz, ad yewwet akken ad yejbed imferǧen ɣur-s, ama s umeslay neɣ s wurar-ines d teḍsa. Mi ara tekfu tceqquft-is, ilaq imferǧen ad fehmen lmaɛna-s, ad ffɣen ferḥen s wayen walan.

Anda-t umgarad i yellan gar umezgun aqbur d utrar?

Amezgun yemxalaf di lweqt ɣer wayeḍ, seg lqern wis 16 neɣ 17 almi d tura. Amezgun di lweqt n yiɣriqeyen yettabaɛ kan ddin. Di temcarḍin-nsen, tettunefk-asen tegnit ad cnun icewwiqen n ddin. Bdan-tt-id yakan akka, imi ɣur-sen i d-yennulfa umezgun, uɣalen syin akkin sskecmen-d tasertit d wayen yeɛnan tugdut-nsen kan. Tturaren-t di berra anda i t-ttwalin akk lɣaci. Ma nuẓa akka ciṭṭuḥ ɣer lweqt n Ṛruman, amezgun ɣur-sen yettwaxdam i yigelliden kan d wid yesɛan ccan, rnu ur sɛin ara azref ad mmeslayen ɣef tsertit. Simmal ad nettaẓ ɣer sdat, ad naf aṭas n tɣawsiwin i d-yernan imi zik daɣen amezgun yettwaxdam kan i yirgazen, d lɛib tameṭṭut ad tetturar di tceqqufin n umezgun. Mi ara nwali lweqt-agi-nneɣ tura, yennulfa-d kullec, amezgun yetturar-it urgaz, tetturar-it tmeṭṭut. Di tzeqqa-ines, tettunefk tegnit i medden merra ad t-ttwalin. Aṭas n umgarad yellan, ur nezmir ara ad nemmeslay ɣef kullec imi amezruy n umezgun d win meqqren mliḥ.

Ad nuɣal ɣer yisura, mmeslay-aɣ-d ɣef yisinaryuyen i d-turiḍ ar tura…

Deg tazwara bdiɣ s tira n teqsiḍin timecṭuḥin, syin akkin neqleɣ ɣer tmedyazt, mbeɛd uɣaleɣ ttaruɣ ticeqqufin n umezgun d wamek i ssawḍeɣ ttaruɣ isura. Taceqquft tamezwarut i yuriɣ ɣef tmurt, d tin iwumi semmaɣ (Tiɣri n wakal) i d-yeffɣen deg ulzuz(marché) ass n 01 ɣuct-agi iɛeddan sɣur Akfadou production ( Aomar chibi). Sɛiɣ daɣen tin iwumi semmaɣ (Tarwa n Lezzayer) i d-yettmeslayen ɣef wayen iḍerrun di tugdut-nneɣ. (Larbi igellil) i d-yesbegginen tamɛict d ssber n yigellilen. Mi ara d-nuɣal ɣer yisura, yella usaru iwumi semmaɣ (Yir targit) i d-yettmeslayen ɣef yiwet n tlemẓit yettnadin ɣef baba-s… Llan diɣ wiyaḍ gar wid iwejden d wid i werɛad kfiɣ s tira i ssarameɣ ad d-ssufɣeɣ yiwen n wass.

Ɛlaḥsab-im, d acu n wuguren i d-tettmagar tmellaɣt tazwawt, d acu i d tifrat i asen-iwulmen?

Ugur akk ameqqran i d -tettmagar tmellaɣt tazwawt neɣ taẓuri arkelli di tmurt n leqbayel, d lqella n ttawilat d tmussni. Anaẓur n tidet ad t-tafeḍ ilul-d yewwi-d yid-s taẓuri. Ur yezmir yiwen ad yuɣal d anaẓur ma ur as-tt-yefki ara Rebbi. Ḥulfaɣ a Kaysa taẓuri ɣur-neɣ d asɛeddi n lweqt. Ma nmuqel kan ɣer ccna, d acu ara d-nini tura di tmellaɣt neɣ deg umezgun? Ur asen-nefki azal-nsen iwulmen, d ayen i yeǧǧan ulin-d wid yessuguten awal, ɣlin wid iweznen ameslay. A win yufan ayen ndir ad d-nini diri-t, ayen yelhan ad t-nessaɛli akken ad yemɣur. Yewwi-d fell-aɣ ad nettbaɛ idles-nneɣ alama d aẓar , ilaq ad nessugmu iɣerbazen, ad slemden amezgun, ccna , lmusiqa, I wakken ad nefk tagnit i wid yessnen ad d-ufraren. A win yufan ad tuɣal d axeddim yesɛan azal akken ad rren medden ddhen-nsen ɣur-s.

Tanemmirt a Nabila ɣef wayen i d-terriḍ. Rnu-aɣ-d awal n taggara.

Tanemmirt d tameqqrant i kemm a Kaysa. Tanemmirt i uɣmis-nwen. Ssarameɣ taẓuri lqayen ara as-yernun ccbaḥa i yidles-nneɣ. Nettɛenni Rebbi tagmat ad tsiɣ iẓuran deg wakal n tmurt-nneɣ, akken ad aɣ-d-teldi tewwurt, ad neddu ɣer sdat.

Testeqsa-tt: Kaïssa Khalifi

- PUBLICITÉ -