Accueil Tamazight D tameɣra i warrac imecṭaḥ

Tizi Uzzu Asfugel n useggas 2017 : D tameɣra i warrac imecṭaḥ

720
- PUBLICITÉ -

Am yal tamnaḍt deg umaḍal, tqubel tmurt n leqbayel aseggas amaynut s lferḥ n uncreḥ, ama deg yixxamen gar iɛeggalen n twacult, ama deg berra gar yimeddukkal neɣ deg yimukan i yettwaggan ɣef ddema n wanect-a. Kra n wassan kan uqbel ad yekcem useggas ajdid, tebda temdint n Tizi Ouzou tcebbeḥ iman-is, ladɣa, deg urti 17 deg tuber neɣ deg umraḥ n usalay anda i rezzunt s ṭṭaqa twaculin s warranw-nsent, i wakken ad d-ṭṭfent kra n teṣwirat s ufella n tcariṭ n Papa Noël neɣ ɛad yid-s s timmad-is. Imi, llan kra n yilmeẓyen i yerran iman-nsen d Papa Noël s lebsa u yewwin-d yid-s tacariṭ yezzuɣur yiwen uɛidiw amecṭuḥ. Zyada ɣef wanect-a, ad naf amekkan, yeččur d tiẓdanin akked kra n yisafaren n tuččit ifessasen. Am cakula, leḥlawat n yal ssenf, lgaṭu. Tella ula d la barbe à papa. Lḥasun, ayen akk swayes ttqabalen aseggas ajdid. Xas ulamma ḥussent twaculin s leɣla n temɛict, meɛna awi-d kan ad sɛeddin kra n lweqt deg unecraḥ d lferḥ akked warraw-nsent. Xas ulamma yal wa s tezmert-is, iswi yiwen : d amagar n useggas amaynut s wudem amaynut, akken xeddmen akk yimdanen deg yal tama n umaḍal. Aṭas i iɛerḍen ad sfeclen imezdaɣ n tmurt n leqbayel, i wakken ad ǧǧen timeɣriwin-agi n taggara n useggas imi i as-neqqaren yimṭurfa-nni n ddin d akken timeɣriwin-agi d leḥram, ur ilaq ara ad tent-xedmen, acu kan imdanen ur fkin ara awal neɣ azal i tiktiwin yecban tigi. Yella ɛad anda sxedmen yimṭurfa-agi iɣil i wakken ad gedlen timiɣriwin-a u sugaden imdanen, meɛna ur ṣsawḍen ara. Ula d aselway n yiwet n tiddukkla taɣelnawt, yessawel-d i yizzayriyen i wakken ad ttgen ara timiɣriwin-agi n taggara n useggas imi, ɣef wakken iwala netta, ayagi akk d leḥram, ulac-it deg ddin. Aṭas, diɣ, i t-id-yufan d ssebba i wakken ad d-ssiwlen s ttawil n Internet ɣer unuḥbus n lxedma d uneɣluq n tḥuna ɣef teɣzi n smana. Acu kan imadanen-agi, neɣ amadan-agi, ur d-fkin ara ismawen-nsen i wakke,n ad ten-ḍefren yimdanen. Nnan-d kan ad yili unuḥbus imi ɣlayet temɛict. Ayagi ur iqenneɛ ara lɣaci xas ulamma ɣlayet tudert s tidet imi ur ẓran ara sani teddun, ma ur ẓrin ara ukked leḥḥun. Ɣef wanect-a, i tt-fran d rray yimawlan n tḥuna n lwilaya n Tizi Uzzu i yennejmaɛen ass-nni n lǧemɛa deg Uxxam n yidles, Mulud Mɛemmri, d akken ad fetḥen akk tiḥuna-nsen imi ayen ssuturen deg ussan-agi iɛeddan yettwaqbel-d sɣur wid teɛna temsalt.

- PUBLICITÉ -

Hocine Moula

- PUBLICITÉ -