Par DDK | 2 Janvier 2017 | 645 lecture(s)

TUBIRET Asileɣ n yiselmaden imunan

Taggara n tallit tis snat n

Iselmaden imunan, ama d widak i d-yufraren deg temsizzelt yeḍran deg unebdu yezrin neɣ wid i d-yulin seg lejrida n leɛḍil, kfan ass n ssebt iɛeddan aḥric wis sin seg tannant-nsen yebdan yakan ass n 24 deg duǧember yezrin. Azal n 1011 seg wid yesselmaden deg uswir amenzu myagaren deg sin n yiɣerbazen n temdint n Tubiret.

Wid n uswir alemmas, d tasnawit Mohamed Seddik Ben Yahia i asen-yeldin tiwwura-s i tannant. Deg tneggarut-a, iselmaden tettunefk-asen tegnit i wakken ad mlilen gar-asen, ad mbiddalen tirmitin, daɣ mmugren-d imaswaḍen d yiselmaden ikesben yakan tirmit deg unnar I wakken ad d-rren ahat ɣef kra n yiseqsiyen neɣ uguren i d-mmugren deg tneɣriyin-nsen. Seg wass amenzu n tannant, iselmaden ttasen-d s ṭṭaqa, ḥeddren akk i tangawin i wakken ad agmen kra n tarrayin d ttawilat swayes ara qablen inelmaden. Ma d aseddu n temsirin neɣ n tneɣriyin, iselmaden, usan-d s waṭas n tuttriwin, d ayen i ten-yeǧǧan zeggiren-d s wuguren, uqbel ad walin acu i ilaqen ad t-ẓren deg wass-nni. Seg tama-nsen, imaswaḍen ur ten-ɣullen ara, imi deg yal tikkelt, leddin askasi i waya, imi ḥsan d akken d tifrat n yiɣeblan ara yeǧǧen iselmaden-agi ad ddun ɣer sdat deg umahil-nsen. Seg tama nniḍen, iwulem kan ad d-nesmekti belli tannant n tikkelt-a, tefka tagnit i wid i d-yusan seg berra n twilayt ad ɣren anda bɣan, yeɛni yal wa ad yetbeɛ tannant deg lwilaya anda yezdeɣ. D acu kan, deg tmaziɣt, aṭas i d-yusan ɣer Tubiret ulamma xeddmen deg twilayin-nniḍen. Ɣef leḥsab n umḍan-nsen, ugar n 30 n yiselmaden i ixeddmen berra n lwilaya i iḥeḍren tannant-a. I wakken ad tixfif fell-asen teɛkemt, tanmehla n usegmi n Tubiret telli i wid d tid yebɣan ad nsen deg uɣerbaz tiwwura-s. D ayen dɣa i iɛawnen iselmaden-a, ad tebɛen tannant almi d taggara-s. Uqbel ad ruḥen, tettunefk i yal yiwen d yal yiwet seg wid i d-yusan berra n Tubiret yiwet n turegt n uttekki. Ad d-nesmekti kan belli amecwar-a n tannant, ad ikemmel deg yimuras n tefsut anda ara d-yili usɛeddi n yikayaden.

Smail. M

0