Am yella aseggas, deg tallit n ucraw n uzemmur, lwelha tettruḥu s waṭas ɣer lɣella ara d-yerr umdan. Tikkelt-a, ulamma aṭas i d-yeqqaren d akken aɛeqqa yeɛmer, rnu yella deg useklu, ɣer lawan n yiziḍ asirem-nni akk yuɣal yexsi. Ɣef leḥsab n wid i d-nemmuger deg lemɛasrat, nnan-d belli lɣella txus, mačči d aya i yetturajun. ‘’Mi bdiɣ acraw, nwiɣ ad d-awiɣ nnig n waya, imi aɛeqqa yella, rnu yeshel i uɣelluy seg useklu. Maca, asmi i d-wwḍeɣ ɣer lemɛasra, ufiɣ leḥsab-iw imal, imi seg yiwen n uqenṭar, wwiɣ-d kan 13 n litrat’’. Dɣa d ayen i aɣ-d-yenna Brahim, yiwen seg yifellaḥen i nemlal. Seg tama-s, bab n lemɛasra, yewwi-aɣ-d tamentilt i iwala teǧǧa azemmur ur d-yefki ara lɣella aseggas-a. “Azɣal iɛeddan iceggeḍ azemmur mačči d kra. Almi i d-ɣlint tmiqwa n lehwa deg tuber iɛeddan, i d-yuɣal uɛeqqa meqqer. D ayen i t-yeǧǧan iɛeṭṭel i wakken ad yesɛu zzit. Ɣas akka tura yettban-d yemmed, tirect ddeqs-is, maca lɣella ad txas, imi aman ur d-usin ara deg lawan ilaqen”. D acu kan, deg tama n tudrin n udrar, lɣella tessefraḥ imdanen, imi deg uqenṭar, wwin-d yimdanen ugar n 18 n litrat. I wakken kan ad d-nesmekti, dakken azemmur n useggas-a mačči ixus deg lɣella, meɛna yegla ula s terwiḥin n kra n yimdanen. Deg La Crête-Rouge, d yiwen n urgaz yesɛan 36 n yiseggasen deg leɛmer-is i yessufɣen tarwiḥt mi akken i d-yeɣli seg yiwet n tzemmurt sdat n uxxam-is. Wayeḍ n 50 n yiseggasen, teḍra yid-s twaɣit yecban tin n umezwaru deg Lesnam, imi ula d netta ur yemniɛ ara seg lmut. Ma d ayen yerzan taruẓi d ujraḥ, leḥsab ur yenneqḍaɛ ara, imi yal ass nsel wa neɣ ta ɣlin-d seg tzemrin.
Smail. M