D tumert i yettɛeddayen berdayen ɣef wul mi ara nwali imura d yimedyazen-nneɣ rẓan asalu i usider n tutlayt. Ṭṭfen abrid n tira d usufeɣ, ulamma weɛrit tegnatin ideg yettnuzu udlis. Dɣa, ɣas d timerwin n yiseggasen-aya segmi yebda aɛaned n tewriqt tacebḥant s yisefra-s, acu kan armi d ussan-a kan i d-yessufeɣ umedyaz-nneɣ Ḥamid Ayt Sliman ammud-is amenzu n yisefra s tutlayt tayemmat. Adlis i iɛeṭṭlen akken ad d-ilal, s uzwel n«Gar wul akked tasa», deg-s azal n 120 n yisefra. Tuget seg-sen ttawin-d ɣef tmagit, tifelseft, timetti, ddunit, atg. Yeffeɣ-d udlis-a deg Internet ɣer teẓrigin Lulu.com, imi ur wɛiren lecɣal deg-s, di leɛḍil ad d-yeffeɣ ula da deg tmurt ɣef wawal n umeskar. «Deg wammud-a, wwiɣ-d taḥawact n kra seg yisefra i uriɣ gar 1977 d 2016. Llan xedmeɣ-ten deg Mustɣanem, Yellel d Гilizan, ayen i d-yeqqimen deg Tmurt n Yizwawen». Akka i aɣ-d-yenna bab n udlis. Ad d-nini belli amaru Ḥamid Ayt Sliman d bab n waṭas n yidlisen s wazal-nsen. Amur ameqqran seg-sen s tutlayt tafransist, maca ɣef taluft tamaziɣt, d tezwawt. D asmekti kan, deg yisefra n wammud-a, ad naf wid swayes yewwi arraz n uxxam n yidles Naǧi Neɛman n Lubnan, deg useggas n 2012.
M. K.