Par DDK | 20 Mars 2017 | 402 lecture(s)

Bechloul

Yettkemmil userdem n tḥuna tiqdimen

Taɣiwant n Bechloul mazal-itt ar ass-a tettqabal aɣbel n tḥuna tiqdimin ur d-nefki ara udem yelhan i temdint. Ttwabnant acḥal d aseggas aya s wuzzal d uḥelyiw, kran-tent yimetjaren anda yal wa acu yesnuzuy. Almi d aseggas yezrin, yettwaddem yiwen n rray s- ɣur yiɛeggalen n usqamu aɣerfan n tɣiwant iwakken ad hudden akk tiḥuna-agi iwakken deg ubdil-nsent, ad yettwaxdem wayen ara d-yesnernin ama deg wudem neɣ lmenfaɛa n yimezdaɣ. D acu kan, rray-agi iqubel-it-id reffu n yimetjaren i yegguman ad ffɣen. D axxam n ccreɛ i tt-igezmen deg rray iwakken ad d-yili usedrem, maca aya ur d-yelli ara deg yiwet n tikkelt. Tigawt taneggarut tella-d ass n lexmis iɛeddan, imi yiwet n tḥanut yellan tettusexdem d asečču uqbel ad tuɣal i usenz n yisufar yemxallafen tettwahud s reffu n wid i tt-yekran. Limer ahat mačči d iɣallen n laman i yellan deg umkan, yezmer ad yili uɛewwiq ameqqran ara iḥebsen aserdem. Seg tama-nsen, wid yekra akka tiḥuna-a, bedden ɣef yiwen n wawal ideg qqaren: “ I tura, amek ara d-nawi lqut i tarwa-nneɣ ma yella neḥbes lxedma?” Meḥsub, ssuturen ad asen-d-taf tɣiwant abdil anda ara kemmlen lḥirfa-nsen. Ma seg tama n yimḍebbren, rray d win ireṣṣan ɣef uḥric n useḥbiber ɣef tudert n yimdanen imi d tiḥuna tiqdimin seg tama, si tayeḍ, tigi ccemtent udem n temdint.” Akka tura, mazal azal n tlata n tḥuna i yetturajun ad d-taweḍ nnuba-nsent mi ara tt-yegzem deg rray uxxam n ccreɛ, iwakken ad bdun wiyaḍ yesɛan tiḥuna d ayla-nsen dima deg umkan-agi. Wigi, yessuter deg-sen uselway n tɣiwant ad sdermen iwakken ad bnun akken iwulem, netta seg tama-s ad d-yefk afus n lemɛawna s usewjed n lekwaɣeḍ iwulmen.

M. Smail

0