Par DDK | 20 Mars 2017 | 396 lecture(s)

Tubiret Taddart n Ilyiten

Yuɣal ɣer lecɣal usenfar n usiweḍ n lgaz

Taddart n At Yilyiten i d-yezgan deg yijifer n udrar n Ǧerǧer deg tɣiwant n Saharidj tesɛadda amur-is n lḥif deg wayen yerzan kra n yisenfaren n unegmu. Win akk i tt-iḍurren s waṭas d lixsas n lgaz ur ttafen ara yimezdaɣ s sshala. Deg tegrest, lḥif d win ur nesɛi tilas, imi ula d tiẓgi i d-yezzin i taddart-a fukken seg-s yisɣaren i tessenger tmes acḥal aya. Sin n yiseggasen ɣer deffir, ilḥeq-d usenfar n usiweḍ n lgaz n temdint ɣer yixxamen, neddhen lecɣal, dɣa anida ara tt-dgeḍ a lferḥ ! Maca, din tecɛel, din texsi. Lecɣal ḥebsen uqbel ad awḍen s azgen, ayen yessexsin target n lferḥ deg wulawen. D icetkiyen, d tibratin, d aqabel n yimḍebbren, yekker uhetwir deg yimezdaɣ, yal wa anda yufa kra n tewwurt ideg ara yesqerbeb ad tt-yaweḍ. Imi akken i qqaren “laẓ yeweɛduyen ur ineqq”, tirza n lwali n Tubiret ɣer taddart-a tbeddel udem i liḥila. Asmi yesla i yimeslayen n yimezdaɣ, Mouloud Cherifi igzem-itt deg rray, yessufeɣ tasqamut i iwalan amek i tella liḥala. Deg taggara n yimalas yezrin, takebbanit yeǧǧan asenfar-a tuɣal-d s axeddim. Akka tura, telha-d s uheyyi n texxamin i yineḥsaben, iwakken ad tqabel lecɣal i tt-iḥebsen acḥal-aya. Iwakken kan ad d-nesmekti, aneḥbus ɣef lecɣal ur d-yelli s ssebba n yimezdaɣ, meɛna ɣef waken i aɣ d-nnan yineggura-a, “tegguma tkebbanit ad tkemmel axeddim s uneɣyuz s ufus anda ur yella ddiq.” Tura dɣa, d ayen i yettunexdamen, imi gar yixxamen, ixeddamen ttɣizin s ufus iwakken ad sɛeddin aqadus ara yessiwḍen lgaz ɣer merra ixxamen.” Seg tama nniḍen, tasqamut ara yektazlen liḥala n ubrid yettawin gar Yilyiten d Wasif asemmaḍ tewweḍ s amkan ula d nettat s uwelleh n Lwali n Tubiret iwumi ccektan yimezdaɣ. D ayen yeǧǧan At Yilyiten ur ttaysen ara ad walin ula d abrid i ttaɣen ad d-tass nnuba-s akka am usenfar n lgaz.

M. Smail

0