Par DDK | 20 Mars 2017 | 675 lecture(s)

Tafaska taɣelnawt n tmedyazt n Udrar n Fad

Ugar n 120 n yimekkiyen

Ass n amhad-a sdat-neɣ, 23 meɣres, ara tebdu teẓrigt tis 15 n Tfaska taɣelnawt n tmedyezt tamaziɣt d tajmilt i Dda Lmulud At Mɛemmer, i d-tessuddus Tdukkla Tadelsant Adrar n Fad n tɣiwant n Ayt Smaɛel. D tafaska ara yilin s lmendad n umasdawan Kamal Buɛmara. Ɣef tiɣri i tikkin, s i d-tberreḥ tdukkla mettwal yennayer, rran-d fell-as ugar n 120 n yimedyazen i ara yemsizewren ɣef wanwa ara d-yawin amaynut d uswir igerrzen, ɣef leḥsab n yisfernan i d-tga tesqamut. Deg wahil n kraḍ n wussan ara tdum tfaska, seld tirza n umaray amatu d yiɛeggalen n Useqqamu Unnig n Timmuzɣa, ad tebdu tegnit n temsikknin ɣef sin n wudmawen n tsekla, Mulud At Mɛemmer d Kamal Buɛmara. Seg teldayt tunsibt ɣef 13:00, ad d-yettwaheggi usarag amezwaru, d tamuɣli ɣef sin seg yiqeddicen n Kamal Buɛmara, s uzwel ‘’Taɣuri tamaynut i «Nekkni d wiyeḍ»’’, akked "Aglam d usissen n usegzawal bu yiwet n tutlayt «Issin»". Gar umsizwer n tmedyazt n tameddit, ad ikemmel wahil deg wass wis sin, ideg ad d-yuɣal ladɣa umsizwer n tmedyazt, d usarag sɣur Massa Buxellu, i tsemma: "Le désert, espace de la découverte du Pharmakon dans la traversée de Mouloud Mammeri". Tameddit, ad d-yili usenɛet n terbaɛt Taɛessast, i d-yerzan seg ugezdu n tesdawit n Tizi Wezzu. Ugar n tegnatin n tmenna ara d-yettilin seg tikkelt ɣer tayeḍ, ad d-yili deg wass aneggaru usenzer ɣef yimifriren n tedwilt iɛeddan. Rnu-as asarag-nniḍen iwumi yettunefk uzwel "Tallelt n Buɛmara deg usmunyet n tezrawin tiseklanin", sɣur Mass Bellac Takfarinas.

M. K.

0