Accueil Tamazight Imeslayen inmidagen n Said Bouda

Ajdid deg tira : Imeslayen inmidagen n Said Bouda

1050
- PUBLICITÉ -

Deg wagguren iɛeddan i d-yeffeɣ yiwen n udlis n yimeslayen inmidagen n Said Bouda. Uṭṭun-agi amezwaru, yefka-s isem Tiftilin. Deg udlis-agi, ad naf 30 n trastiwin s tifrat-nsent i d-yellan deg taggara n zzmam-agi n yiluɣma. S teqbaylit timserreḥt akked kra n wawal atraren, yessaweḍ Mass Bouda ad d-yerr s annar tameslayt s wurar. Yezmer ad ilin imeslayen inmidagen-agi d allal n ulmud s wurar n tmeslayt i yinelmaden, am wakken i yezmer ad yili d tasarut i yimeqqranen i yettnadin ɣef yinumak n wawalen iqburen. I wakken yeweḍ umeskar ɣer uxeddim yecban wa, yesseqdec amawalen d yisegzawelen i yellan deg unnar n tmaziɣt d unadi-ines s umata, akka aɣ-d-yenna Said Bouda. Aṭas n wuguren i d-yettmagar mi ara yesseqdac awalen yesɛan imesli uffay neɣ wid yesɛan sin yimesla, ɣef wakken iwala. Ayen i t-yettaǧǧan ad yettaṭṭaf aṭas n wakud i wakken ad yexdem yiwet n trasta. Yelmed Mass Bouda tira n tmaziɣt weḥd-s. Yella ixeddem, yakan, imeslayen inmidagen s tefrensist. Syin, ikemmel-iten ula s tmaziɣt. Yal ddurt, ad naf yiwet n trasta n Said Bouda deg yisebtar n Uɣmis n Yimaziɣen n La Dépêche de Kabylie i d-ittefɣen yal ass n letnayen. Yettnuz udlis s 100 DA, yella akka tura deg Tizi Uzzu.

- PUBLICITÉ -

H.M

- PUBLICITÉ -