Yiwen umerkanti, temmut-as tmeṭṭut-is, ibɣa ad iɛiwed zwaǧ, iwwet ad yaɣ yiwet n tlemẓit agur deg yigenni nettat di lqaɛa. Tezzyen d ayen kan, alammi wi, d-iwten ɣer-s ad tezweǧ ad tecreḍ deg-s ayen ur izmir. Iruḥ s axxam n baba-s, iẓra-t-id, yenna-as-id : “Di nekni s yimawlen aql-aɣ tenneqqbaleḍ, maca ṛṛay mačči ɣur-neɣ kan i yeqqim, iwwi-d ad nciweṛ taqcict. Ruḥ ! Lexbar s ɣur-neɣ”. Mi cawren yelli-tsen tenna-asen-id “aqbel ad qebleɣ ad iliɣ d tameṭṭut-is, maca s ccerṭ. Nnan-as: “d acu n ccerṭ-agi i d-tesnulfaḍ daɣen a yelli ?. Argaz d amerkanti, ikseb cci d ssraya, ayen akk ara as-tessutreḍ ad am-t-id-yawi, ad tiliḍ am tmeṭṭut n ṣelṭan neɣ ahat kteṛ”. Terra-asen: “siwlet-as ad d-yas ad t-ẓreɣ, seg yimi-w ara issel ccerṭ-iw”. Ssawlen-as i unesbaɣur yusa-d, nnan-as imawlen n teqcict:” yelli-tneɣ teqbel acu kan ɣur-s yiwen n ccerṭ, ad t-tesleḍ kan axir seg yimi-s”. Ssawlen i teqcict tusa-d. Tenna-as : Qebleɣ ad rnuɣ d tameṭṭut tis snat acu kan s ccerṭ”. Yerra-as-d: “ccreḍ akk ayen tebɣid, aɣbel deg-I”. tenna-as: ”ihi, nekk ur zmireɣ ara, ad gneɣ deg umeṭraḥ deg-i teggan tmeṭṭut-ik tamezwarut, ad tt-yerḥem Ṛebbi, suffeɣ-it-id seg uxxam, ḍegger-it neɣ efk-it, lḥaṣun nekk ur t-ttwaliɣ ara deg uxxam, eg-as akken i ak-ihwa. Tin ɣur-s ad i yi-d-txedmeḍ wayeḍ s rric akk n yigḍaḍ illan di teẓgi”. Amerkanti, izder di tsussmi, ad as-tiniḍ iggugem di dqiqa. Taqcict d yimawlen-is sikiden deg-s ttrajun melmi ara d-inṭaq. Am winn-a ara as-ifken abeqqa, idduqqes-d yenna-as i teqcict : “ Kkes aɣbel d ayen isehlen”. Amerkanti-nni, yuɣal s axxam-is, issendeh ixeddamen-is, suffɣen ameṭraḥ seg uxxam, syin iceyyeɛ ɣer yigḍaḍ ad d-asen akken ma llan, mejṭuḥ meqqer. Azekka-nni, wwḍen-d akk yigḍaḍ slid Bus. Akken tlata n wussan, netta d aceyyeɛ ɣer Bus ad d-yas akken ad d-yefk cwiṭ si rric-is. Ass wis rebɛa, yusa-d, yufa-d akk igḍaḍ illan di teẓgi ttrajun-t akken ad sencwen iman-nsen akken amerkanti ad ixdem ameṭraḥ i tmeṭṭut ara yaɣ. Yenn-asen Bus: ” Nekk ur sencaweɣ ara iman-iw i urgaz ittagaden tameṭṭut. Dɣa ula d igḍaḍ-nni akk i d-yusan ḍefren ṛṛay n Bus, uɣalen akk ansi i d-kkan, ugin ad kksen rric-nsen, ad scencwen iman-nsen. Seg wass-nni, Bus yuɣal d Si Bus, ttqadaṛent akk.
Ramdane Lasheb