Seg wass n 20 alamma d 22 di yebrir 2017, taɣiwant n Bujima ad jmaɛ imyura d yimedyazen di rreḥba n udlis ara d-yillin di temkarḍit ‘ MUḤYA ‘ n tɣiwant , di tezrigt-is tis ukkuz . Ad tili aseggas-a d tajmilt i umusnaw Mulud at Mɛemmar . I Wid akk iḥemmlen imru d tferka, ha-tt-an ad tili rreḥba n udlis di Bujima, taɣiwant n Wagnun , ahil ad yili d amesbaɣur imi mi ara nejmaɛen iḥeddaden n wawal iban kan d agerruj ara d-ilallen. Ger yimyura ara yilin ad d-nader : Saɛid Cemmax , Arezqi Meṭṭref , Amin Zawi , Naser Buḍyaf , Saɛid Saɛdi , Malika Arabi , Ḥand Saɛdi , Yusef Merraḥi , d waṭas n wiyaḍ ara d-icebḥen timlilit-agi n udlis ama s yisaragen ara d-xedmen, ama s usnuzu s ubuddu i widak iḥemmlen taɣuri. Akken daɣen ara mmeslayen ɣef umussnaw ameqqran Mulud at maɛmmar d uxeddim mmeqren i yexdem ɣef Tmaziɣt imi di tezrigt n useggas-agi ad as-tuɣal tejmilt . Di tfaska ad ilint tzeɣwa n tira , n tɣuri , akken daɣen ad yili umezgun . Amaynut n useggas-agi imi aṭas n yixxamen n usezreg ara yettekkin di tfaska n udlis, d ayen ara yejjen imeɣriyen ad afen ayen ttnadin n idlisen.
S.Yamani