I lmend n usmekti n wass agraɣlan n ugrud, i d-yettilin yal aseggas deg umenzu n waggur n yunyu. Tidddukkla tadelsant Ixulaf n Ǧerǧer n lwilaya n Tizi Uzzu, thegga-d yiwen n wahil s wazal-is ɣef teɣzi n sin wussan. Imi bdan leqdic-nsen ass-nni ahad 31 deg waggur n maggu deg temkerḍit tagejdant n tɣuri taɣerfant n lwilaya n Tizi Uzzu. Xedmen dina aṭas n yiremad idelsanen yecban: asikew n tmucuha, ideg i d-tulles Massa Touati Zoulikha snat n tmucuha s teqbaylit, snat-nniḍen sɣur Massa Amrouche Samar. Syin akkin llant-d snat n temsizliyin i warrac imecṭah, yiwet deg usuneɣ tayeḍ deg tullsa n tmucuha. Γer taggara n wass, sneɛten-d i warrac uraren iqburen. Ma d ass-nni n lexmis, amenzu n waggur-agi ideg nella, bdan ahil-nsen ɣef 11h00 n tsebḥit deg tzeqqa tameẓyant n umezgun n uxxam n Yidles Lmulud At Mɛemmer n Tizi Uzzu. Zwaren s tɣuri n yisefra sɣur Hamlet Yasmine akked Ziram Damia, syin akkin tella-d tullsa n tmacahut “Mačči s kra n wayen yettberiqen d ddheb”, sɣur Massa Bousdia Sonia, terna-d kra n teqnaẓ. Sakin d taceqquft n umezgun ɣef wazal n ugrud akked d tutlayt n tmaziɣt, syin ɣer-s d ccnawi n Taleb Rabeh akked Cherif Kheddam s ṣṣut n warrac imeẓyanen. Ma ɣef 12h00 n uzal d afella, tella-d tcennayt tameẓyant Manel n 6 n yiseggasen, i d-icebḥen taqaɛet s kra n tezlatin icebḥen aṭas, tin ɣur-s d asenɛet n yiwen n usaru n wunuɣen yettembiwilen s teqbaylit, tsemma-as Massa Louiza Lakneb “Γerdidduc”, ma ɣer taggara akk tella-d tukci n yigerdasen n utekki i wid ittekkin deg tmeɣra-agi, am wakken diɣen i fkan arrazen i warrac-nni i d-yufraren deg snat-nni n temsizliyin; 3 n warrazen i wid i d-yufraren deg usuneɣ tlata-nniḍen i wid i d-yufraren deg tmucuha.
Adaoun Abdelghani