Par DDK | 19 Juin 2017 | 346 lecture(s)

Imtawayen n Paris ɣef twennaḍt

Tejbed iman-is Marikan

Di lawan ideg wid yesseḥbibiren ɣef twennaḍt ttraǧun kra n wayen yessefraḥen sɣur tarbaɛt n tmura i yettekkan deg yimtawayen n Paris, a-t-an tɛeyyen-d Marikan ussan-a iɛeddan n yunyu s tuffɣa-ines seg ugraw-a i yettemɛahaden ɣef lfayda n twennaḍt d ugama. Ɣef wawal n tɣamsa tamaḍlant, ssebba n uṭṭixer n Marikan, tekka-d srid sɣur uselway-is Trump i yellan yefka lɛehd i wid ibuṭin fell-as deg tefranin iɛeddan. Am wakken I d-yenna, dakken ma yella ibedd-d ad yesṭixxer tamurt-is seg terbaɛt-a akken ad yili d imekdi (fidèle) i wawal-is "Marikan send kullec". Imi akken yettwali netta, ma yeqqim deg ugraw-a, ad tenṭer tdamsa n tmurt-is. Ula d aselway aqbur n Marikan, Barak Oubama, yesḥassef ɣef rray-a i yeddem urfiq-is. Ma d aselway amaynut n tmurt n Fransa Macron, iwala ayen akka texdem Marikan d tuccḍa i nettat s timmad-is, d tafaẓṭa (erreur) i yimal n umaḍal. Aya, ad d-iwekked amek yewɛer ɣef kra n tmura, akka am Marikan, ad sizwirent lfayda n umaḍal d tegnaw ɣef lfayda-nsent tadamsant. Ulama Ccinwa, i yellan d tamurt i yesluɣuyen tignaw s waṭas send Marikan, twekked-d s yisem n uneɣlaf-is amezwaru dakken nettat ad tkemmel amciwer i ubaɣur n twennaḍt.

M. K.

0