Ass-nni n lexmis ɣef 13h00 n uzal, i tebda tmeɣra n ccna n tallalt yettwaxdamen deg Uxxam n yidles Lmulud At Mɛemmer, i lfayda n ugrud-agi Mouloud bab n 25 n wagguren. D tameɣra i d-thegga tiddukkla tadelsant Tirza n Tizi Uzzu, s lemɛawna n waṭas n yidisan yecban: Tanmehla n yidles n Tizi Uzzu, Axxam n yidles Lmulud At Mɛemmer, Taneɣlaft n yilmeẓyen d waddal, Asqamu aɣerfan n lwilaya (APW), taɣiwant n Tizi Uzzu akked tin n Ain Zaouia, tin Draa El Mizan, d tin n Frikat…atg. Agrud-agi n 2 n yiseggasen deg lɛemer-is, yuḍen s yiwen n waṭṭan iweɛren yerna yeqlilen, yettwassen s yisem (Spina Bifida), iduwa tikkelt tamezwarut deg tmurt n Tunes, maca ur yufi ara ɣur-s. Tura ilaq ad t-awin ɣer Fransa i wakken ad idawi. Ha-t-an akka tura deg sbiṭer n Draa El Mizan, yettmeɛbar akked lmut. Ussan-agi iɛeddan rzan ɣur-s ɣer sbiṭer-agi, kra n yiwudam n yidles yecban: tanemhalt n yidles Massa Gouméziane Nabila, akked waṭas n yiɛeggalen n tiddukka-agi Tirza, yecban Djamy Kerdja, Samir Bouakline, Fatima Kaci, akked uselway n tiddukkla-agi Mass Kader Bouacherine. D tameɣra ideg ccnan 20 n yifennanen yecban: Malik Kezoui, Rabah Oufarhat, Djammy Kerdja, Si Lakhal, Farid Gaya, Youcef Guerbas, Rachid Hamouche…atg. Anekcum yella-d s 300 DA kan, d azal uzmil (prix syomblique). Ad d-nesmekti belli, tiddukkla-agi Tirza, tlul-d ass n 18 deg waggur n dujember 2013, deg Uxxam n yidles Mulud Mɛemmri. Gar wayen texdem, timsizzelt n tira d tajmilt i Lwennas Maɛtub deg 2014. Tajmilt i umedyaz Ben Hanafi deg 2015 akked tejmilt i Rabah Oufarhat deg 2017. Mass Bouacherine, aselway n tiddukkla-agi yenna-d: “ ad snimmreɣ aṭas imɛiwen-nneɣ i d aɣ-d-yefkan afus n tallelt ladɣa Massa Kemmar d Massa Gouméziane akked Mass Ould Ali Lhadi…atg. Nhegga-d tameɣra-agi i lmend n ugrud-agi i d aɣ-iɣaḍen seg tikkelt tamezwarut mi tenwala deg sbiṭer, nessaram-as ccfa s lemɣawla ncallah ad yuɣal ad ibedd ɣef yiḍaren-is. Tameɣra-agi tɛedda deg tegnatin yelhan aṭas, ulamma ulac aṭas n lɣaci maca nekni nenna-d ad nɛiwen s yidrem i d d-nejmaɛ agrud-agi Mouloud”.
A. A.