Par DDK | 17 Juillet 2017 | 453 lecture(s)

Bgayet

I wacuɣer mazal tiftisin s lexlas ?

Am yiseggasen iɛeddan, ur d-yelli kra n ubeddel rrif n yilel n waɣir n Bgayet, deg tsemhuyt-a n unebdu.

Yal amḍiq i yebɣa yiwen ad t-iẓur i uɛumu, ilaq ad yawi yid-s aṭas n tedrimt swayes ara ixelles ayen ara yesseqdec. Seg uqiḍun i yeɣlayen i ukraw, ɣer uneɣsar (parking) s 100 n yidinaren, i yettuḥettmen akken ur yettaweɣ wara takerrust, ɛeddi ɣer ubduz s 100 n yidinaren-nniḍen…atg. Armi i d-iban i kra umḍiq-a n tukksa n uqebli, yecba akk imukan n ttjara, am ssuq, anafag, atg. « A win yufan a Rebbi ad tili teftist d amkan n tukksa ɣef lxaṭer i yal amdan, yesɛa neɣ uhu. Maca ha-t-an aẓawali ur yezmir ad n-yerzu weḥd-s, aniɛad s twacult». D awal n yiwen n ubabat seg Ayt Smaɛel. Ilaq ad d-nini deg wussan yezrin, yeffeɣ-d wawal ula sɣur lwali n Bgayet s timmad-is akken ad ilint teftisin ldint baṭṭel i medden. Meɛna, seg tama-nniḍen, wid yeddewwiren i sswaḥel-a teɣzi n unebdu ur ufin s wudem ilaqen taɛessast d lḥers fell-asen. Zgan ttḥettimen ɣef yal aḥewwas, d amerray neɣ uhu, ad ixelles idinaren ma ulac ɣas ad yuɣal ansi d-yusa. D ugur ameqqran i yeqqimen ur yefri ar iḍa, deg teswiɛt ideg simmal rezzun medden ɣer teftisen, wissen ahat ad afen kra n tesmuḍi, imi azɣal yewweḍ ɣer tla-s.

M. K.

0