Mačči d ayen yessefraḥen ayen swayes i d-yegla useggas-a i waɣir n Bgayet d yimezdaɣ-is. Tazɣint tadamsant (crise économique), teskanay-d akken ilaq ssmamat d latarat-is. Aṭas n tɣiwanin n twilayt i yeccektayen ɣef lexsas n tedrimt deg texzanin-nsent, i wakken ad izmirent ad kemmlent neɣ ad kfunt lecɣal i yeqqimen d azgen. Nnig waya, ula d tidukkliwin yemxalafen nṭerrent ayendin imi ur asent-kcimen yidrimen swayes ara xedment kra. Akka dɣa ara naf dɣa tiddukkliwin yellan deg tɣiwant n Ayt Smaɛil, ur asent-yewwiḍ kra n userdi ɣer texzant-nsent, aseggas-a. Si tama-nniḍen, ula deg lecɣal n baylek yettban-d wugur adamsan n waɣir d tmurt s umata ; imi asenfar n ususseɛ d ureqqeɛ n ubrid n Ɛecba (les gorges) deg Xerraṭa d amedya igerrzen i waya. Asmi yettwaṭṭef sɣur tkebbaniyin Ozgün-ETRHB yella-d umsifham ɣef tazwara n 2017 akken ad yamed. Maca seg wass-nni, acḥal n taganin i d-yellan sɣur yixeddamen ɣef ssebba n tedrimt. Imḍebbren n tkebbanit-a, ruḥen armi sṭaxren kra n yiqeddacen. Aṭas n yirgazen n tsertit d yisegbaren n tdamsa i d-yennan d akken aɣir n Bgayet, aql-it gar wid yenṭerren, i ixussen ayendin deg yisenfaren n tneflit. Dɣa ula d amḍan amecṭuḥ n yisenfaren seg wid yettwajerrden, aql-iten akka tura, kra yeḥbes, kra yettɛeṭṭil ugar n wamek i as-d-tewwi.
M. K.