« Neγ xtir ğğaγ-d awal ara iɛicen deg umkan-ik. » Akka i d-yenna umedyaz-nneγ. D wa i d abrid i yefren Mustapha Bacha, mmi-s n Tasaft Ugemmun i d-yurwen acḥal n yizmawen, tamnaḍt ur nekni i ddel, tin akken yesswen lemrar i yiɛdawen.
Ass-a, wwden 23 n yiseggasen segmi yunag, maca abrid i d-yenjer, d umennuγ yedfer zgan fell-as d inagan, ur yezmir ḥedd ad t-yettu. Segmi i t-teccelqef tmettant ass n 08 di γuct 1994, yal mi ara d-yezzi umulli-a, taddart-is, leḥbab-is, wid ukkud yecrek amennuγ d waṭas n yimdanen, ttemlilin-d di Tasaft i wakken ad rren tajmilt i yiwen seg wid ur nessin awexxer, ur nefrin berru n ṭṭbel deg waman. Yak d « Aḥbib n tegrawla » i yenna fell-as Lwennas ! Seg mi yella d anelmad, ul-is yečča times mi yettwali tutlayt-is tezder, tettwakbel amzun akken tbubb lɛar. Izerfan n umdan γaben, ddu neγ susem. D ayen i as-yefkan lğehd d tebγest γer ulmad i wakken ad yadef tasdawit n Lezzayer anda yemlal d wid i t-yecban. D tagnit i wakken ad yebdu amennuγ-is, imi yemmuger-d ineγmasen yerkeb lḥir γef tlelli n umeslay, n tudert s umata. Din dγa i d-ssekren tirebbaɛ n ccna, n umezgun i wakken ad ssiwḍen tiγri-nsen mebɛid, acku s wudem n tsertit mačči d ayen isehlen. Di yal tikkelt ideg ara d-yezzi umulli n tmettant-is, ttawin-d yimeddukkal-is cchadat γef wayen yexdem almi i d-iban s tidet d aqerru n tmacint deg unnar n umennuγ. Ass n ssebt yezrin, d yiwen n lsas yettusemman γef yisem-is i ibedden s asmekti n umecwar-is anda i d-rzan medden seg yal tama. Seg Lezzayer tamanaγt alamma d Bgayet, ɛeddi γef Bumerdes, Tizi Uzzu d Tubiret. Imeddukkal n umennuγ n Mustapha, usan-d mebla aneɛrud i wakken ad bedden s aẓekka-s, ad as-inin : « Aql-aγ da, amennuγ ur as-nebri ara, nefka-ak lɛehd, ur nettwexxir ara. »
M. Smail