Ttettwaxeleq-d tdukli-a, ass n 03 deg yunyu deg usuggas yezrin. Sedduyen-tt yilmeẓyen n taddart n Tewrirt Meqqran yetabaɛen taɣiwant n Larebɛa n At Yiraten. Yal mi ara d tili tedyant , ttqabalent. Tikkelt-agi, heggan-d yiwet n tmeɣra i lmendad n yinelmaden i d-yewwin ikayaden, ama n uswir amenzu, alemmas neɣ n win n BAC . Ad tili tmeɣra deg ussan-agi i d-iteddun , anda ara fken arrazen i yinelmaden i d-yewwin ikayaden s tezmilin ifazen imi deg ukayad amenzu yufrar-d yiwen unelmad s 9,40 , ma yella deg uswir alemmas, ad naf tazmilt i yeṭṭfen taqacuct d 17,21, ma yella deg ukayad n BAC, d tazmilt n unelmad d 18,31. Anect-agi, d ayen i yessfarḥen iɛeggalen n tdukla imi s teɣzi n useggas, heggan-asen-d ahil n uselmed : xedmen-asen timsirin i yinelmaden imi sɛan 18 n iselmaden deg tangiwin yemxalafen. “Ihi ass-a yeffeɣ laɛtab ɣer tafat imi i d-nemeger tizmilin-agi” i d-yenna yiwen uɛeggal . Si tama-s, iberreḥ-d Mass Zeggar Malik, netta d yiwen n uɛeggal di tdukla-agi d akken sɛan aṭas n yiɣeblan ladɣa seg tama n tedrimt imi ur sɛin ara allalen i ilaqen akken ad seddun tidukla , akken daɣen i d-yenna d belli ur sɛin ara axxam anda ara tili tdukla. Dɣa, ttafen-d aṭas n iɛewwiqen ladɣa mi ara d-yeḥḍer unejmuɛ n yiɛeggalen n tdukla. Yerna-d ikemmel deg wawal-is belli tidukla, ttɛawanen-tty imawlan n yinelmaden akked tejmaɛt n taddart, maca mačči d ayen s wayes ara texdem tdukla akken iwata isenfaren i d-tettheggi . Asirem-nsen, d akken ad sɛun amkan anda ara selḥun tiddukkla di tugnatin iwulmen . I usmekti, leqdic-a ad yili deg yiwen n uxxam n tmeɣriwin n taddart n Tewrirt Meqqren .
S. Yamani