Yekcem s ẓzur ɣer JSK deg useggas n 1993, yeffeɣ-itt s ẓzur deg useggas n 1994. Yal taɣawsa tesɛa taggara. Ihi, tikkelt-a d taggara n uselway Moh Cherif Hannachi i yellan d aqerru ɣef terbaɛt n Yilmeẓyen n leqbayel JSK, ɣef teɣzi n 24 n yiseggasen.
Yettwakkes s ɣur iɛeggalen n tesqamut n tedbelt n umcawer ass-nni n letnayen 7 deg waggur n ɣuct ɣef lewhi n 14, deg uxxam n JSK. Ass-nni, yella-d umtawa gar akk iɛeggalen n tedbelt, ula d imeddukkal-is, Azlef d Chioukh, qeblen s shala astexxer-nn imi ɣef wakken i d-nnan « Xas ulmma yexdem aṭas i JSK, meɛna yal tadyant tesɛa taggara u Hannachi d lwan kan ad yeǧǧ tarbaɛt n JSK. Acu kan mazal-t ad yeqqim d aselway n yiseɣ n terbaɛt n yilmeẓyen n leqbayel JSK ». Sya ar 16 deg waggur n ɣuct 2017 anda ara d-yili usbeddi n uselway amaynut i JSK, d Malik Azlef d Med Zeghdoud i iseddun timsal deg uxxam n JSK. Gar iɛeggalen n tedbelt i yellan ass-nni n tukksa n Hannachi, ad naf : Mellal, Azlef, Chioukh, Azouaou, Kana, Bouzit,…atg. I usmekti, aṭas n temsbaniyin, tikliwin akked ucetki i d-yellan deg temdint n Tizi Uzzu, seg useggas n 2015 ar 2017, sɣur wid iḥemmlen JSk anda ssuturen astixer n Hannachi ɣef uqerru n terbaɛt n yilmeẓyen n leqbayel JSK. Ladɣa imyurar-nni iqdimen, yecban Fergani, Belahcène, Adghigh, Iboud d wiyaḍ, acu kan ur ssawḍen ara ad t-sbeɛden ɣef umekkan-is. Yal tikkelt yettaf-d tawwurt ansi i yesɛedday iman-is. Tikkelt, ad tt-id-yerr ɣef usleɣmay, dɣa, ad t-yestixer, ad d-yawi wayeḍ deg umekkan-is, tikkelt-nniḍen ɣef yimyurar i yestahzayen deg unnar, tikkelt ɣef yinefrayen i yettaken afus ɣef JSK, ɣef wakken yettwali. Meɛna aya ur iqenneɛ ara amur ameqqran n yimferǧen n JSK imi walan tarbaɛt-nsen i ilaqen ad turar ɣef telɣuɣa akked teqbuct ama n Lezzayer neɣ n Tefriqt, tuɣal deg umqelleɛ i wakken ur tettsubbu ara ɣer usmir adday. Aya, itezzi acḥal-aya ɣer terbaɛt n JSK imi yal aseggas yettuɣal-d yiwen usaru : tetturar deg wadda n telɣuɣa mačči deg tqacuct akken tuɣ tannumi. S ustixer-agi n Hannachi, yuɣal-d lferḥ ɣer yimferǧen n JSK ass-nni mi slan s tukksa n Hannachi ɣef uqerruy-is. Aṭas i t-id-sbanen deg yiberdan n temdint n Tizi Uzzu seg tikli d usuɣu. Aṭas, diɣ, i yesteqsayen ɣef uzekka d yimal n JSK, imi xas akken yestehza Hannachi deg taggara-a, acu kan yewwi-d deg tazwara-as teqbucin akked telɣuɣa ama d tid n Lezzayer neɣ tid n CAF. Seg tama-nniḍen, ar tura ala Sadmi akked Ait Djoudi i d-ibeggnen s wudem unṣib d akken bɣan ad ṭṭfen taselwayt n JSK. Sya ɣer 16 deg waggur n ɣuct, ad d-banent aṭas n temsal, imi gten wid yebɣan ad ilin ɣef uqerru n terbaɛt n yilmeẓyen n leqbayel JSK.
Hocine Moula