Tura akka imi iɛedda uḥric wis sin n temsizzelt i d-yellan deg wussan seg waggur n yulyu, Tanmehla n Usegmi n Tubiret tessewjed ttawilan iwulmen i tannant ara d-yilin seg 19 d asawen n waggur n γuct i deg nella. D aγerbaz alemmas Slimane Smili ara yeldin tiwwura-s i uqabel n yiselmaden imaynuten n sin n yiswiren : alemmas d unsnawi. Iwakken ihi ad d-tili tannant-a deg tignatin igerzen, anemhal n Usegmi n Tubiret yessawel-d deg wussan-a yezrin i yimaswaḍen n uswir alemmas anda i d-yessuter deg-sen ad swejden iman-nsen i tikci n ufus n tallelt i tsuta-a tamaynut n yiselmaden yuhwajen iwellihen, ama deg tarrayt n uselmed ama deg usuddu n tneγrit neγ ahat deg wayen yerzan tanefsit n unelmad. Din dγa i yettwaddem rray i ufraq n yigrawen almend n tangawin, imi llant akka ti ara yesɛun drus n yimunan. Ass n lexmis yezrin ihi, lawan ideg i d-usan yimaswaḍen γer tkadimit i yettuɛeggen s wudem unṣib wid ara yilin deg tannant-a xas akka ulamma d tallit n yimuras n unebdu.
M. Smail