Si zik ɣer yimezdaɣ n tudrin leqbayel, tujya n waṭas n lehlak-ak tettili-d s yimɣan i d –tekksen di lexlawi, neɣ i teẓẓun deg tferkiwin. “Zik yakan, xussen wallalen udawi, nekni zik-nni ur nettruḥu ara ɣer yimejjayen, nettdawi iman-nneɣ s yimɣan nettaf ɣur-sen’’ i d-tenna Nna Werdiya .
Ma nmuqel akka ɣer wazal yesɛa udawi s yimɣan, ad naf ula di zman n wass-a, aṭas n yimdanen i yettdawin s teḥcict, segmi i d-fkan yimnadiyin deg uḥric n tezmert ttbut n udawi s yimɣan ur d-igellu ara s waṭṭanen-nniḍen i umuḍin. I ubeggen n wazal sɛan yimɣan di tudert n yal ass, Tasqamut n Lɛuqqal akked Tiddukkla tadelsant Tigmi n taddart Mzeggen deg tɣiwant n Yilulen n Umalu, tama n Buzeggan, llin s wudem unsib ass-nni n 14 almi d 16 deg ɣuct deg nella tafaska tis 04 n yimɣan n usejji i rran ad tili d tajmilt tikelt-agi i umeddakkel n ugama n taddart n yigersafen, Mass Mouhand Ousallah Messaoudene, yewwḍen laɛfu Rebbi ilindi. Ahil n tezrigt-agi d amerkanti deg-s : isaragen, amezgun , ccna, timsikniyin n yidlisen usnanen i d-yettmeslayen ɣef usejji s yimɣan akked d yisufar-nniḍen.
Ismawen n yimɣan d wazal-nsen
Ass-nni amenzu n tfaska nemlal-d kra n temɣarin n Mzeggen fkant-aɣ-d ismawen n kra n yimɣan n usejji, nnant-aɣ-d i wacu i ttwasxdamen.
Imɣi: Asexdem-is d wazal-is
Qlilu: i tekkes aqraḥ n tɛebbudt
Azebbuj : i wid i helken aṭansyu, d bu semmaḍ, aman-is daɣen lhan i bu mellal ɣer yigerdan
Marnuyet : Yettrus s ddaw n yiles, yelha i lqu
Jaɛda n udrar : D asewwi deg waman, Telha i yiriran
Awarmi : Ttbexiren s yis-s i tfunast, i wakken ad tesɛu udi
Timija : Tteqnen-tent medden i tgecrar, mgal zellum
Tifelɛulma : Qeṭṭɛen s yis-s iriran
Afaryis: Yelha i bumellal
Tizaɛtranin : Lhant i ubeḥri
Gerninuc: Tetten-t tlawin di tament tid ur nettarwen ara
Felgu : Yettwasway i waḍu
Amagraman : Xeddmen-t d teḥmamet i uqerru , i tekkes leqriḥ
Tuẓedla: Tessishil tuẓda I ukerciw
Lkina : Tettesway deg waman, telha i lqu
Imɣan i d –gellun s lemḍara
llan kra n yimɣan i ɣef i d-mmeslayent temɣarin n Mzeggen wigi ttwagedlen, kra deg-sen neqqen ula d iɣersiwen d yimdanen akka am umendekrar, ḥenṭeḍ n yizgaren, amerɣennis isarraɛ lmal mi ara ad t-yečč. Am wakken i d-mmeslayent ɣef yigersalen, wid i d-yemɣin di tulmut akked d tasaft, neɣ di lqaɛa weḥd-sen. Qqaren-asen igersalen n uqjun, wigi zemren ad nɣen win ara ad ten-yeččen.
Kra n yinzan icudden ɣer yismawen n yimɣan di Mzeggen
Deg wayen i d-negmar ɣer temɣarin n taddart llan ula d inzan.
-Akal ifilku senz-it, akal umadaɣ debɣ-it, akal n wafar ffer-it
-Amer mačči d tifelɛulma, ad nɣaɣ argaz s tmira.
-A nger-ik agarninuc , aẓar-ik wwin-t waman kečč tettraɛriɛeḍ.
Azal n yimɣan di lawan n tegrawla n 54 deg taddart n Mzeggen
Ur qqimen ara kan yimɣan d allal n usejji deg taddart n 49 n yimeɣrasen. ɣef wakken i aɣ-d-mmeslayent temɣarin yeddren di tallit-nni, nnant-d d akken deg umkan iwumi qqaren alma dinna i d-tettkesnet tulawin tiɣunam akked d gerninuc. Ad tent-xelḍent s cwiṭ n zzit n uzemmur, ad ten-fkent d azwar i lmujahdin mi ara ad d-rzun ɣer taddart.
Taqsiṭ n teblaḍt n tejmaɛt taddart
Di tirza-nneɣ ɣer Mzeggen, nesgunfa di tejmaɛt n taddart, dinna i nemlal Dda Dahmane Adjoudj d aḥeddad n wawal, dɣa yules-aɣ-d taqsiṭ n teblaḍt. Yenna-k s ucmumeḥ: ”Tabladṭ-agi seg wakken tecbeḥ, ɣezzifet telha i usenned, ttalsen-aɣ-d imeqranen belli, zik-nni ussan-d Wat Tfilkut i d-yezgan di Lɛec n Yililten wwin-tt ɣer tejmaɛt-nsen. Azekka-nni, kkren-d Wat taddart, tekker temhawca ɣef teblaḍt. Asmi i tt-ufan di tejmaɛt n Tfilkut , dɣa rran-tt-id s amkan-is , yedda-d ula d inebgi Rebbi i yufan igen fell-as …’’ .
Seg yimir i wwint lemtel-agi tulawin n Mzeggen:’
‘’Mzeggen ma iger nnefxa , d abrid-is ayen “
‘’Ma txus tewrirt Ɛemrus, Tifilkut tɛus
Tameɣra di tfaska
I wakken ad tili tfaska n yimɣan n usejji d tagnit n lferḥ, tella-d yiwet n tmeɣra s wazal-is, imi wwin-d tislit s teksiwt n leqbayel, argaz yelsa-d abernus, taqufet n yinebgawen defren-d deffir s yiḍebbalen d ilewlawen. Tilmeẓyin n taddart merra s teksiwin d lfuda , ttecrurudent di tzenqatin n taddart am tsekrin, teddunt ccennut, timɣrin ttembeddalent izlan di tala n Sidi Mhend Umouhend anda i d-tugem teslit. S wakka i yekfa leqdic adelsan ussnan i d-tettheggi yal aseggas taddart n Mzeggen, kra n win/tin i d-yerzan, iwala, yelmed, yennecraḥ, yekkes lxiq . D wigi i d lesrar n tfaskiwin n unebdu di tudrin n tmurt n leqbayel.
Brahim Benhamouche