Ussan-a ineggura, awal yuzzel deg yimawen γef ubeddel i d-yedran deg tneγlift tamezwarut anda Abdelmadjid Tebboune yettwakkes mbeɛd 98 n wussan kan segmi yettwasbedd i wakken ad d-yuγal deg umkan-is Ahmed Ouyahia. Leryuy ggten, mgaraden, ama seg tama n uγref neγ ahat seg yisertiyen.
Akabar n FLN, yenna dakken : « Aselway n tigduda yessexdem lğehd i as-yefka lqanun i wakken ad isbedd win i as-yehwan. Ur yeffiγ ara i wayen yellan deg tmendawt ». Ikabaren-nniḍen, awal-nsen ibedd γef lḥers i yettidir udabu d wayen i t-yeğğan yexdem abeddel-a. D acu kan, tamuγli tezzi s waṭas γer win i d-yuγalen, imi tuget n yimdanen ugaden amer d leḥris i ten-yettraǧun. D tidet, wulfen medden d akken Ouyahia d win ur nqebbel ara asuzzer n tedrimt deg wayen ur nelli ara d amsezwer. Ɛeddant yakan tlufa, mi akken yella lḥers meqqer γef tmurt, netta i d-yusan i wakken ad tt-id-yessufeγ seg wanu. Ass-a, tililit-is d aneγlaf amezwaru, iban d akken d tilufa iɛewqen iwumi ara yefsi ccedd. Ahat nezmer ad d-nebder ukkuz n temsal i t-yettraǧun ass-a Ahmed Ouyahia anda ilzuzen neγ sselɛa yellan tettwarhen deg yisugan ad d-teffeγ γer leswaq, imi yekker uhetwir fell-as di lawan n Tebboune. Taluft tis snat, d tin yerzan aheggi i tefranin n waggur n wunbir i d-iteddun, imi d asiher s wazal-is. Timlilit ara yesdukklen imɛelmen n lerzaq, anmalu yettḥaraben γer yizerfan n yixeddamen d udabu d asiher meqqren daγ i yettrağun Ouyahia, anda iwulem ad d-yeffeγ s yigemmad ara yesğehden axeddam deg tudert-is. Taluft-nniden, d tin yerzan aṣaduf n tedrimt ara d-yilin deg useggas n 2018, imi fell-as i bnan akk yisenfaren n tmurt. Akken yebγu yili lhal, Ouyahia, yeṭṭfen yakan lkalafa-agi i tikkelt tis tlata di 22 n yiseggasen, yeḥsa acu iwulmen deg lawan yecban wa.
M. S.