Deg uḥric-agi wis sin, ad nawi awal ɣef tezlatin s wayes yettwassen, tameddurt-is akked yimahal-is s umata.
Tizlatin swayes yettwassen aṭas
Ayemma ṣṣber ur ttru, Afus deg ufus, A mmi-s n lɣerba, Zzher ulac, Ay ul-iw nehhuɣ-k kulass, A ttmeniɣ medden kessben, Ulac wi ɛzizen fell-i, Tura mi ɛeddant fell-i…atg.
Tameddurt-is d yimuhal-is
Ilul ucennay d umjahed Farid Ali, s yisem-is aḥeqqani Khelifi Ali, ass n 09 deg waggur n yennayer 1919 deg taddart n Ikhelfounène deg tɣiwant n Bounouh akka tura, deg lwilaya n Tizi Uzzu. Deg useggas n 1935 yunag ɣer temdint n Lezzayer Tamaneɣt, yuɣal dina d axeraz yettxiḍi iṣebbaḍen d warkasen. Sin yiseggasen kan yemmut baba-s, dɣa deg useggas n 1937 isuhel ɣer tmur n Fransa. Ur iɛeṭṭel ara yuɣal-d ɣer tmurt, yemlal-d imeddukkal-is: Krim Belkacem, Lhocine Faâdjaben…atg. Deg useggas n 1956, iḥebs-it-id lɛeskar n tmurt n Fransa deg Bounouh, syin akin sɛeddan fell-as lbaṭel, kkes-d ayen ur sexdimen. Uɣalen serḥen-as deg useggas n 1957. Dɣa yekcem ɣer terbaɛt n tẓuri n ukabar n FLN, deg i d-iyeẓra ddeqs n tmura, yecban: La Tunisie, La Chine…atg, i wakken ad siwḍen tiɣri d temsalt n ugdud azzayri ɣer tmura n leǧnas. Deg useggas n 1964, yettwaḥbes deg lḥebs n Berouaguia, syin akin mi i d as-id-serḥen, yuɣal deg useggas n 1967 yunag i tikkelt tis snat ɣer tmurt n Fransa, yefka afus n tallelt i waṭas n yifennayen i yufa dina, ladɣa wid ur nettwassen ara. Syin mi d-yuɣal ɣer tmut deg useggas n 1976, yuɣal d amekfaḍu (animateur) deg umaṭaf wis sin, yella i sedduy tadwilt-nni n yicennayen n uzekka. Yunag i tikkelt tis tlata ɣer Fransa deg useggas n 1977, ssebba mi yehlek aṭas. Aseggas kan mebɛed yuɣal-d i tikkelt taneggarut ɣer tmurt, dɣa ass n 19 deg waggur n tuber 1981 yewweḍ leɛfu Rebbi deg sbiṭer n Boughni, imiren yella yesɛa kan 62 n yiseggasen deg leɛmer-is. (taggara)
A. A.