Snat n ssmant kan i iɛeddan ɣef tuɣalin n yinelmaden s iɣerbazen-nsen, i d-yellan ass-nni n larebɛa 06 deg waggur-agi ideg nella, ha-ten-in bdan ama d inelmaden neɣ d imawlan-sen, la cetkayen ɣef waṭas n yiɣeblan.
Ddeqs n yiɣerbazen i iḥebsen ɣef leqraya, llan kra imi ugin yinelmaden yeqqaren deg kra n yiɣerbazen ilemmasen d tesnawiyin yellan deg lwilaya n Tizi Uzzu, ad lemden deg yir tignatin n ulmad, llan wiyaḍ d imawlan n yinelmaden yeqqaren deg yiɣerbazen imenza i yugin i warraw-nsen ad kecmen ɣer tzeɣwa n tɣuri. Deg tuget kan, mačči d uguren imaynuten deg unnar n uselmed. Gar wuguren iwumi ssuturen tifrat-nsen yinelmaden d yimawlan-nsen, ad naf deg tazwara d ugur n ttawilat n usiweḍ n yinelmaden ɣer yiɣerbazen-nsen. Aɣbel wis sin iɣef ttcetkin, d win n usečči n yinelmaden deg tnawalin tiɣurbizin (cantiens scolaires). Ad d-nebder kra n yiɣerbazen i iḥebsen ɣef uselmed deg wussan-agi iɛeddan: aɣerbaz alemmas “Metrek Aomar” n Tizi Rached, tasnawit “frére Ait Betta” n Timizart, aɣerbaz amenzu akked uɣerbaz alemmas yellan deg Timizart Loghbar, yetabaɛen ɣer tɣiwant n Tizi Uzzu. Am wakken daɣen i yella wugur yerzan afraq n tallelt-nni n yinelmaden (3000DA), imi ala 50% i ferqen ar tura, mazal azgen n yinelmaden ur wwin ara lḥeqq-nsen. Mebla ma nettu lexṣaṣ n yinemhalen deg yiɣerbazen. Imi 198 n yiɣerbazen imenza, 37 n yiɣerbazen ilemmasen akked 10 n tesnawiyin ur sɛint ara inemhalen unṣiben, dɣa rran deg yimeḍqan-nsen iselmaden iqdimen neɣ imagazen imatuyen (surveillants généraux). Ula d iselmaden ur ten-zgilen ara yiɣeblan, imi ugur amezwaru i d-ttmaggaren d amḍan meqqren n yinelmaden deg tneɣriyin. Yella wanida yewweḍ leḥsab n yinelmaden 40 deg yiwet n tneɣrit, ladɣa deg yiseggasen imezwura n uswir amenzu. Ugur wis sin, d win n lexsas n yidlisen deg yiɣerbazen, imi aql-aɣ deg ddurt tis kraḍ, mazal iɣerbazen ur nesɛi ara idlisen, ama d wid ara ferqen d afraq, ama i lbiɛ i wid yebɣan ad aɣen d lbiɛ. Am wakken daɣen i llan yiselmaden i ceggɛen ɣer wanda yebɛed lḥal, d ayen i yeǧǧan tuget deg-sen ad beddlen amkan-nni i d asen-fkan tikkelt tamezwarut. Uguren i d-mmugren yiɣerbazen n lwilaya n Tizi Uzzu,mmugren-ten ula d lwilayat n Bgayet akked Tubiret.
Adaoun Abdelghani