Sendiḍelli n ssebt, 30 deg waggur-agi n cutember ideg nella, ɣef 14h00 n tmeddit, tella-d temlilit deg Uzday adelsan Rahmani Slimane n Aokas deg lwilaya n Bgayet. D timlilit ideg i d-yemmeslay umaru d uselmad deg tesdawit n Mulud Mɛemmri n Tizi Uzzu akked Usudu (institut) aɣelnaw n tutlayin d tɣermiwin n usamar “INALCO” n Paris deg tmurt n Fransa, wagi Mass Saïd Chemakh i d-yewwin awal ɣef usentel-agi “ Tasekla tamaziɣt yettwarun, (amedya n tsekla taqbaylit). Imeslay-d s telqay ɣef wayen yellan d aqdim deg-s d wayen i d-yenulfan deg yiseggasen-agi yezrin. Am wakken daɣen i d-yebder aṭas n yiwudam n tsekla taqbaylit, yebda-tt-id seg yimezwura alarmi d wid n yiseggasen-agi ineggura. Am wakken daɣen i d-imeslay ɣef tewsatin n tsekla tamaziɣt ladɣa taqbaylit d wanida yewweḍ leqdic deg-sen, d wayen akk i d-yellan d amaynut deg tewsatin-is yemgaraden.
A. A