Accueil Tamazight Aselmed n tira deg yiḥuna i warrac imeẓyanen

Ayt Smaɛel : Aselmed n tira deg yiḥuna i warrac imeẓyanen

606
- PUBLICITÉ -

Ulama kfan yimuras u llant-d tazwara n cutember tuɣalin tunsibin i uɣerbaz, thegga-d ddurt-a iɛeddan tdukkla tinmetti-tadelsant Asirem n Krun yiwen n uḥanu (atelier) n tira sɣur amalas Fares Idir. Ttiɛad-a, i d-yettwasuddsen deg taddart n Ayt Tɛisiwt taɣiwant n Ayt Smaɛel, yemmug ɣef teɣzi n kraḍ n wussan i warrac n ddaw 15 n yiseggasen. Deg uxxam n tdukkla, ufan iman-nsen warrac deg umaḍal-nniḍen n tmussni akked tɣara tamaynut n uselmed armi ḥulfan s wugar n tlelli akken ad senfalin ayen lqayen, ad siwḍen ad d-arun tiktiwin yelhan ɣef waṭas n tlufa. « Akken ma llan, ɛeqleɣ deg wudmawen-nsen amek i asen-yeɛǧeb lḥal. Ufan tagnit twulem-iten akken ilaq meskud d arrac i llan. Ula d asiwel siwilen-iyi-d s yisem-iw seg wakken ḥulfan nemqarab nezzeh. Walan-iyi-d d ameddakkel i yebɣan ad asen-d-yefk kra n wayen yelhan, mačči d aselmad n uɣerbaz i izemren ad ten-yewwet ma yewwi-d lḥal ». D awal n Fares Idir mi yekfa uḥanu i d-iga. Deg kraḍ n wussan-a, lemden warrac ayendin d tilufa i yerzan asugen, d wamek ara ldin abrid i tekti-nsen ad d-teffeɣ s timmadis ɣef tewriqt tacebḥant. Deg wass aneggaru dɣa, tella-d tɣuri n yiḍrisen s taɣect yeɛlayen, syin ttunefken warrazen n usebɣes i kraḍ n yimenza i d-yufraren. Am wakken i asen-yefka umalas tidlisin n tmucuha i warrac merra i yekkin deg uḥanu-a. « Si tama-w, ur zmireɣ ara ad agiɣ tinnubga n tdukkla i uheggi n kra n ttiɛad i warrac-nneɣ. Ihi teqqim-d kan deg ufus n yilemẓiyen n tdukkliwin ma bɣan ad kkren i uqeddic ». I iseqqef Fares awal-is.

- PUBLICITÉ -

M. K.

- PUBLICITÉ -