Yebda ujerred n yinelmaden deg wumuɣ n usɛeddi n tlata n yikayaden n taggara n useggas aɣurbiz 2017-2018 (5e, BEM akked BAC). Akka i t-id-wekked tneɣlaft n usegmi aɣelnaw, Massa Nouria Benghabrit, deg tansa n tneɣlaft-is. Dɣa ajerred i ukayad n taggara n uswir n tesnawit yettwassnen s yisem n BAC, yebda ass-nni n letnayen yezrin 09 deg tuber 2017, ma d tallit n ujerred deg wumuɣen n usɛeddi ama i yinelmaden iɣurbizen neɣ i yimunnan, ad teddu ɣef teɣzi n waggur. Ttiɛad aneggaru n ujerred, ad d-yili ass n 09 deg unbir 2017. Yettili-d ujerred i ukayad-agi deg tansa-a n Internet: http://bac.onec.dz. Yetturaǧu ad d-yili usɛeddi n ukayad-agi n BAC gar 03 ar 07 deg waggur n yunyu 2018. Ma d ajerred i ukayad n uswir n taggara n uɣerbaz amenzu, yettwasnen s yisem 5e, yebda seg wass-nni n lḥed 15 tuber 2017 alamma d 15 unbir 2017, deg tansa n Internet:http//bem.onec.dz, d akayad i yetturaǧun ad sɛeddin yinelmaden ass n 23 deg waggur n maggu 2018, deg yiɣerbazen-nsen am yiseggasen iɛeddan. Ma d ajerred n yinelmaden deg wumuɣen n usɛeddi n ukayad n taggara n ulmud alemmas, yettwassnen s yisem n BEM, yebda seg 15 tuber alamma d 15 unbir 2017, deg tensa n Internet:http//cinq.onec.dz, akayad i yetturaǧun ad t-sɛeddin yinelmaden gar 28 ar 30 seg waggur maggu 2018.
A. A.