Yewwi-d Uḥuddu Aɣarim (Protection Civile) n Bgayet, deg yiwen n wulɣu i d-yeffɣen ussan-a kan, kra n yisallen ɣef leḥsabat n yineḍruyen d uxeddim i asen-d-yellan i yirgazen-is n usellek deg tsemhuyt-a (saison) n unebdu. Deg wayen i d-yeddan d tilɣa, ad nwali d akken rzan-d ɣer teftisin n Bgayet 9 983 620 n yimdanen. Ma yella d amḍan aneggaru n wid iɣerqen aseggas-a, deg teftisin yettwaɛussen neɣ uhu, yewweḍ ɣer 23 n yimattanen seg twilayin yemgaraden. Am wakken aṭas n wid i d-yettwaselken seg tmettant ibanen imi ttwaḥesben 3758. Gar-asen ttwadawan 2752 rrif n teftist, 250 nniḍen tḥettem-d lḥala-nsen asiweḍ ɣer sbiṭar. I useɛlem kan, aṭas n yiɣraqen i d-wwin yiɛewwamen i yimanen-nsen, imi ahat ɛumen mi d-teskanay tbeḥnuqt ini azewwaɣ, neɣ ddan deg rray-nniḍen ixesren mi necden tiftisin n yiẓra, am tid n Bulimaṭ. Seg tama n yindaren n tmes, akken neẓra yakk, d tawaɣit meqqren i d-yeḍran deg tẓegwa aseggas-a. Armi ugar n 4000 n yihikṭaren i yerra ujajiḥ d iɣiɣden din d da. Ama d tiẓegwa yeččuren, d amadaɣ, d tiwṭayin n tuga, d tiferkiwin n ssaba neɣ d isekla n yigumma. Seg waya, yelḥeq usiḍen n ttjur i yerɣan ɣer 6020. D ayen i yessḥezznen ayendin n yifellaḥen d wid yesseḥbibiren ɣef twennaḍt. Deg wayen i terna tessegra-d tmes d taxessart, jerrden 2 n yigerbiyen n yifrax, 159 n teɣrasin n tzizwa d 2 n yikerrusen. Ula d kra n tnezduɣin n medden uɣen-tent. Ad d-nerr awellih d akken tadwilt n useḥbiber mgal indarren n tmes deg waɣir n Bgayet, mazal-itt tettkemmil ayyur-a n ṭuber, ɣef wakken i d-iwekked Uḥuddu Aɣarim. Ma d ameslay ɣef yisehwa (laksidat) n ubrid, ayen igellun s terwiḥin ugar n yineḍruyen-nniḍen, ad d-yili ussan-a I d-iteddun.
M. K.