Arrac xedmen akk ayen i asen-d-yenna ṣṣut-nni, dγa s lεun n Ṛebbi mγin-d sin n yiffan deg uẓekka nni n yemmat-sen, yiwen n yif yettak-d udi ma d wayeḍ yettak-d tament. Uγalen warrec-nni mi yewwin cwiṭ n tceqqimin-nni n uγrum, ad ṛuḥen ad ççen γef uẓekka- nni n yemmat-sen, tikkelt seg yif-nni n tament, tikkelt seg yif-nni n wudi. Dγa arrac simmal ttizwiγen ḥellun Yiwen wass tenna – as i yelli-s : Ṛuh tbeε-iten ad tezred d acu i xeddmen ayen i ten-in-tufiḍ xedmen, xdem . Tetbeε-iten Σica, ad twali dacu xeddmen. Tufa-ten-in la teṭṭen seg yiffan-nni i d-yeffγen deg uẓekka n yemmat-sen. Akken tṛuḥ ula d nettat ad temceḥ seg-sen, dγa yiwen yefka-as-d tafuyi ma d wayeḍ yefka-as-d idammen. Tuγal-d s axxam la tettru, teḥka-as-d i yemma-s i yeḍran yid-s . Tṛuḥ tmeṭṭut tamcumt γer uẓekka n takna-s, tafen iffan-nni i γef d as-d-teḥka Σica, tuγal-d s axxam tenna-as i urgaz-is ad yawi amger ad ten-id-icerref. Iruḥ urgaz, icerref iffan-nni lameεna xelfen-d uγalen-d xiṛ n zik. Tuγal tenna-as daγen ad yuγal ad ten yeqle&epsilon,; argaz niqal yugi, yenna-as: Anef-asen a tameṭṭut ur tesεiḍ deg acu i aγ-ḍuṛṛen !. Nettat tugi tenna-as ala tukksa ara tt-wakksen. Lameεna xas akken yuγ-as awal, iffan ttuγalen-d xir n zik. Tuγal tmeṭṭut tenna-as i urgaz-is: Ilaq, abrid-agi ad tṛuḥeḍ ad tent-mesxeḍ. Argaz akken iṛuh ad ten-yemmsex dγa yettewwet-d di tmeqbert, yemmut γef uẓekka n tmeṭṭut-is.Arrac igujilen qqimen-d γer yambabat- sen tesserwa-asen lemṛaṛ. Aqcic, tefka-t γer yiwet n taddart tebεed, ad ikes lmal i ccix n taddart-nni. Ma d taqcict teggra-d γur-s am txeddamt-is.Yiwen wass, ccix nni n taddart yenna-asen i warrac-is yebγa ad yezweǧ. Dγa mkul yiwen deg warrac-nni yehder-as-d γef weltama-s. Yesla – asen-d umeksa-nni yenna-as: Nekkini a sidi ccix, sεiγ yiwet n ultma ma tettru d lehwa, ma teḍsa d iṭij, mi ara temceḍ, yiwet n tama d ddheb, tayeḍ d lfeṭṭa. Dγa ccix-nni yenna-as: Гef akka iyi-d-wessfeḍ weltma-k-agi, aqlihi uγeγ-tt!. Yekker uqcic iceggeε-as-d i weltma-s ad tessewǧed iman-is ad tt-yaγ ccix n taddart.Akken tesla yambabat-sen s wayen yellan, tenna-as ad teddu yid-s Σica. Thegga-asent aεwin; yelli-s tefka-as yal lεez, terna-as ayeddid n waman, ma yella d tarbibt-is, tefka-as taḥbult n uγrum ugar lemleḥ smid, d sin n yiniγman-nni ixerbucen i tuγ tannumi tettak-asen-ten nettat d gma-s.
Tettkemmil seg tgemmi n teqbaylit