Accueil Tamazight « Ẓriɣ yella waṭas n wayen nezmer ad nexdem …»

Awal akked Sadeq Rebbaɛi, aqerruy n wumuɣ FFS deg Ayt Smaɛel : « Ẓriɣ yella waṭas n wayen nezmer ad nexdem …»

910
- PUBLICITÉ -

Aɣmis n Yimaziɣen : Mbeɛd xemsa n yiseggasen i yidis n uselway aqbur n tɣiwant Mass Ɛebdun Nasir, i yuɣalen tura d amazan (député), tbeddeḍ-d i tikkelt-nniḍen i uselḥu n tɣiwant. D acu i ak-ideggren ladɣa ɣer waya ?

- PUBLICITÉ -

Sadeq Rebbaɛi: Annar asertan deg tmurt-nneɣ s umata neɣ deg tɣiwant n Ayt Smaɛel ladɣa, yettimɣi deg-s yinijel, asennan, akicaw, uzzu, idmim d wayen-nniḍen seg tɣawsiwin n diri. Ihi ala ma ncemmer i yiɣallen, ad nekker s afras swayes nqaɛed taferka ma nebɣa ad nidir deg-s akken iwata ɣef teɣzi n xemsa n yiseggasen i d-iteddun. Ɣur-i, ala ddiɛaya n lvuṭ i yellan d tagnit i useggem n yimal. Deg-s dɣa ad neɛreḍ ad nessefhem i medden ayen ineṭḍen timetti n wass-a d tnegrawt i d-leḥḥun ɣer-s ma ur teccenṭuṭṭef ara deg ubrid n umennuɣ. Ihi, nekk d yimdukkal-iw deg ukabar n Tirni n yiɣallen inemlayen, nger-d iman-nneɣ i tefranin-a, acku numen belli imḍebbren n yikabaren n udabu ur xdimen ara ayen ilaqen, ur gin amkan i usegmu n tmurt. Ur ilaq ara ad asen-neǧǧ amkan ad rnun ad ṭṭfen tisura n udabu deg tɣiwanin d lwilayat. Ma yella i usawen, snegren taluft n tsertit, gan ayen merra yettarran Azayri ad yerr aḍar ɣer deffir deg temsalt n tsertit, ilemẓiyen n FFS deg Ayt Smaɛel, begsen akken ad d-kksen leḥkem n uɣref seg waccaren n yimesbaṭliyen-a, akken ad yeqqim d ayla-nsen, imi nekni seg wid yettcawaren agdud deg wayen i t-yerzan d wayen yebɣa.

D acu i d asenfar i d-tewwiḍ i xemsa n yiseggasen i d-iteddun ma yella trebḥeḍ?

Aḍu n rrbeḥ ncallah ad d-yali fell-aɣ, am yal tikkelt. Ulamma neḥsa s lewɛara n taluft d lexsas n tedrimt deg teswiɛt-a, maca nesɛa limin deg uɣref d yilemẓiyen n taddart belli ad ilin i tayet-nneɣ. Nekni ad nennaɣ s wayen iwumi nezmer akken ad nessifsus taɛkemt ɣef yimezdaɣ. Ɣef waya isenfaren caḍen deg uqerruy. Maca gar lecɣal igejdanen, nezmer ad d-nebder deg tazwara taluft n waman i yellan d taɣawsa i ixussen nezzeh imezdaɣ. Deg waya ilaq ad d-nini belli mbeɛd mi tga tɣiwant tazrawt n usejhed (étude de renforcement) AEP n Ayt Smaɛel akked taddart n Rrif seg Lɛenser Azegza seg Tsexriwt, nessaweḍ newwi-d asenfar-a s 45 n yimelyaren, i wakken ad sɛun aman merra yimezdaɣ d tuddar n tɣiwant. Rnu ɣer-s aman yellan deg Leɛnaser ara d-nessiweḍ ayyuren i d-iteddun. Nga daɣen tazrawt n ureqqeɛ n uẓeṭṭa AEP n tudrin n Ayt Tɛisiwt d Tala Ɛṭa d wayen mazal ur ifukk deg tɣiwant, imi tadrimt-nsent s wazal n 9 n yimelyaren nettraǧu ad tt-id-fken deg wussan-a. Asenfar-nniḍen d ayen yeqqnen i twennaḍt d usizdeg; annect-a ad t-nexdem seg leqdicat imezwura imi nessaram ad neg afus deg ufus lwaḥi d yimezdaɣ i wakken ad nessiweḍ ɣer lmerɣub. Wis tlata d afud (énérgie) ama n Lgaz neɣ n trisiti. Wis rebɛa d lakulat-nneɣ i ilaq ad nesnerni aseggem d useqɛed deg-sent. War ma ttuɣ ilemẓiyen d wayen i ten-iceɣben, d tlawin, iɣef ara neqdec deg xemsa n yiseggasen i d-iteddun

Mi d-tbedreḍ ilemẓiyen, nwala umuɣ n FFS d ilemẓiyen deg tuget…

D tidet! Deg waya nesɛa iswi. Nekni nɛewwel ad nefk tagnit i yilemẓi, acku ayen i aɣ-yerran i deffir mi nẓerr bu εecrin d aṭufan netta zik 13 n yiseggasen d argaz. Yak mačči d amɣar ara iqedcen, ara yazzlen? Ilemẓiyen i d-newwi deg umuɣ n FFS d irgazen yesɛan tirmit deg waṭas n taɣulin, yal wa anda iqeddec d wanda ixeddem, maca merra-nsen sɛan lebɣi n umennuɣ d tismin ɣef tɣiwant-nsen. Ilaq ad nẓer d akken imdanen i yesɛan imukan n uxeddim, d imḍebbren deg tkebbaniyin timeqranin, mačči d lexsas n uxeddim neɣ kra-nniḍen i ten-id-yewwin bexlaf lebɣi i umennuɣ i usnefli n tɣiwant-nsen.

Aṭas i yeqqaren ulac later n tlawin deg ukabar-nwen. D acu i d ssebba?

Akabar deg-s aṭas n tlawin, aṭas n tlemẓiyin d waṭas n tmeɣnasin. Ttbut ɣef waya, nesɛa aṭas n tlawin i yellan d tiqerra n wumuɣen n FFS deg waṭas n tɣiwanin. Ma nebder-d kan tamurt n yiqbayliyen, ama deg Buǧlil neɣ deg Ayt Tudert di twilayt n Tizi Uzzu, d timeɣnasin-nneɣ i d-yekksen imukan-nsent s temmeɣnest d tezdeg n umennuɣ. Maca, ɣur-neɣ deg tɣiwant n Ayt Smaɛel ad d-nini yella lexsas deg wannect-a, ɣas ma tebda tettifrir-d tmeṭṭut, tebda tettara awellih i wannect-a tugart deg tdukkliwin. Gar yisenfaren-nneɣ ɣef tmeṭṭut dɣa, nenwa ad nɛiwen s tirmit i wakken ad d-nesbed tidukkliwin ara ixedmen ɣef tlawin, imi numen belli d yiwen n ubrid i d-yettrebbin timmeɣnest, d allal ara icudden gar tlawin akken ad d-ffɣent seg tsusmi i tent-yewten deg tizi n wass-a. Ula d rray-nsent aql-aɣ nettxemmim i usenfar ara t-yeǧǧen ad d-yaweḍ i tɣiwant, ur yettɣimi ara kan deg uxxam.

Meskud tjerrbeḍ yakan deg 5 n yiseggasen asefrek n tɣiwant. Yaḍra tumneḍ d akken isenfaren igejdanen ad maggen deg Ayt Smaɛel ulamma txuss tedrimt?

Ma yella unbir n 54 d tanekra i tukksa n uzaglu ɣef yizayriyen, d amennuɣ mgal tamḥeqranit, akken ula d ass-a. Unbir n 2017, d amennuɣ s wudem-nniḍen, d ibeddi i tayet n tmetti deg teswiɛt n ddiq akken ad nessegmu s wayen i nezmer taɣiwant-nneɣ. Ihi s timmad-iw umneɣ yella waṭas n wayen nezmer ad nexdem, yella wacu yemmuggen ilaq ad yettwaḥrez, yella wacu ilaqen ad yemmag akken i ak-d-nniɣ seg llina. Syin ɣur-s taɣiwant d tsertit, d tmetti, d yidles d wayendin n temsal i yezmer umdan ad yeẓẓu s drus n ttawilat. Asmi yeṭṭef ukabar n FFS tisura n tɣiwant, uɣalen imezdaɣ ssnen d acu yellan, ssnen d acu ilaqe, ssnen aselway n tɣiwant-nsen. Meḥsub yerẓa zzerb yellan gar yimezdaɣ d yimḍebbren-is armi qqlen am yimdukkal! Annect-a ur ilaq ara ad aɣ-iruḥ!

M. K.

- PUBLICITÉ -