Tameddit n wass-nni n lexmis 7 deg duǧember 2017, deg tzeqqa n tameqqrant n Uxxam n umezgun amniḍan Kateb Yacine n Tizi Uzzu, i d-bannen yigemmaḍ ineggura n temsizzelt n Muḥya n wureɣ.
D timsizzelt deg tezrigt-is tis rebɛa n warraz n Muḥya n wureɣ n uḍris n umezgun ifazzen s tmaziɣt. Ɣef lewhi n 16h00, tella-d tukci n warrazen i tlata n yiḍrisen i d-yufraren deg temsizzelt-agi, sɣur tesqamut n uktazal n yiḍrisen. Yufrar-d : Mass Boudarène Ali deg umḍiq amezwaru, d netta i yewwin arraz n Muḥya n wureɣ, s lqidar n 150.000 DA. Ma d arraz n lfeṭṭa yewwi-t Sid Nas Mohamed Larbi s wazal n 100.000 DA. Ma deg umḍiq wis tlata, win n udrenz (Bronze) s wazal n 50.000 DA, isaḥ-d Toufik Kaoudji. Am wakken daɣen i d-rnan yimsuddsen n temsizwert-agi aseggas-a arraz n tebɣest neɣ n tesqamut. Maca aseggas-agi yenqqes wazal n yidrimen n warrazen-agi s uzgen winna yellan 300.000DA yuɣal 100.000DA. Ma d win yellan n 200.000DA, tura yuɣal ɣer 100.000DA. Ma d wis tlata yellan s 100.000 DA, aseggas-agi yuɣal ɣer 50.000.00DA. Maca uqbel tukci n yismawen n wid i d-yufranen, yella-d usenɛet n usaru-nni “Imdnanen-agi heddren kan”, i yura Muḥya d aḍris, syin akkin rran-tt d asaru. Syin ɣer-s, yewwi-d Nourddine Ait Slimane, kra n yisefra n Muḥya. Ma ɣer taggara maḍi, tella-d turart n tceqquft “Mmet ihi” n Salem Amrane i yewwin arraz n Muḥya n lfeṭṭa n usegass n 2016, i yerra ɣef usayes Massinissa Hadbi. Am wakken daɣen i rzan waṭas n yiwudam n yidles ɣer uẓekka n Muḥya, sersen fell-as tameqqunt n yijeǧǧigen, syin fkan tinagiyin-nsen ɣef ubabat n umezgun aqbayli. Am wakken daɣen i d-tella tɣuri n yisefra sɣur umedyaz Kadir Meddour, llant-d diɣ snat n temsikniyin ɣef tmeddurt d yimuhal n Muḥya, yiwet deg uxxam n yidles Lmulud At Mɛemmer, tayeḍ deg uxxam n umezgun amniḍan Kateb Yacine. Tella-d tmeɣra-agi n taggara s tilin n waṭas n yiwudam, ama d tawacult n yidles ideg tella Massa Gouméziane Nabila d tanemhalt n yidles, d Mass Farid Mahiout d anemhal n Uxxam n umezgun Kateb Yacine. Llan daɣen watmaten n Muḥya, Mohamed d Mouloud, am wakken diɣen i llan yiwudam n tsertit yecban: Ouahab Ait Menguellat d aselway n tɣiwan n Tizi Uzzu, d win n At Yanni…atg. Ma d asrusi n yiḍrisen n umezgun yettekin deg temsizzelt-a, sersen-ten imawlan-nsen uqbel 20 deg unbir iεeddan. Yella-d usersi-nsen ama deg Tenmehla n yidles d Uxxam n yidles Mulud At Mεemmer neɣ deg Uxxam n umezgnu amniḍan n lwilaya n Tizi Uzzu. Ɣer taggara n ujerred, 12 n yiḍrisen i yemḥezwaren ɣef 3 n yimeḍqan imenza, sɛeddan-ten wat tesqamut n uktazal deg uɣerbal, dɣa d Mass Omar Fetmouche i d aselway n tesqamut-agi, am wakken daɣen i llan ɣer tama-s yimussnawen deg tutlayt tamaziɣ akked umezgun. Ad d-nesmekti s yidisan idelsnen i d-iheggan leqdic-agi, gar-asen: Tanmehla n yidles n Tizi Uzzu, akked Usqamu Aɣerfan n Lwilaya ( A.P.W) n Tizi Uzzu, s tallelt n Uxxam n yidles Mulud At Mεemmer n Tizi Uzzu, s lemεawna n Uxxam n umezgun amniḍan Kateb Yacine. Tameddurt n Muḥya Ilul Mass Muḥend u Yeḥya s yisem-is n ṣṣaḥ Abeddlah Muḥya, deg wass amenzu n waggur n unbir deg useggas n 1950 deg Yiεezzugen, ma d laṣel-ines n taddart Ath Eurbah deg tɣiwant n Iboudranene. Ikemmel almud-is asniwi deg tesnawit n Amirouche deg temdint n Tizi Uzzu, ma deg useggas n 1968, yekcem ɣer tesdawit n Lezzayer Tamaneɣt , syin deg useggas n 1972, yeffeɣ-d s ugerdas n turagt deg Tussnakt (licence de Mathématique). Aseggas kan sdat-s, yebda axeddim deg tesdawit n Paris VIII. Dɣa dinna deg tmurt n Fransa i d-yessnulfa netta d yimeddukkal-is, yiwen n usikew n tsuqilt akked tserwest. Yeɣra kra n temsirin n tmaziɣt, deg tesdawit n Lezzayer Tamaneɣt, ɣer Mulud Mɛemmri.Yemmut deg tmaneɣt Paris deg tmurt n Fransa, ass n 7 deg waggur n duǧember 2004. Yettuneḥsab d ababat neɣ d tigejdit n umezgun s teqbaylit, am wakken daɣen i yeqdec aṭas deg tmedyazt. Am wakken daɣen i ixdem tasuqilt d tserwest i waṭas n tceqqucin seg tutlayin-nniḍen, gar-asen-t: “Am win yettraǧun Ṛebbi” (En attendant Godot) n Samuel Beckett, “Aneggaru ad d-yerr tawwurt” (La Décision) akked “Llem-ik, ddu d uḍar-ik” (L’exception et la régle) n Bertolt Brecht, (La jarre) neɣ “Tacbaylit” swayes yettwasen aṭas…atg. Tura daɣen ddeqs n tmucuha akked tullisin, akked yisefra i yettwacnan sɣur inaẓuren imeqqranen, d wagi i d abrid n timeɣnest-ines ɣef tutlayt d yidles amaziɣ s umata akked win n leqbayel s wuzig.
Adaoun Abdel Ghani