Seg tama n Yiferḥunen, deg Tizi Uzzu, i d-yusa yisalli ara yesferḥen akk imura Izwawen abeɛda, imeɣnasen n tmaziɣt s umata. Seld ayendin n leɛtab d ugani yennulfa-d dayen uxxam n teẓrigin n Gamar d Seddiri s yisem n « Tiẓrigin Ccix Muḥend Ulḥusin ». I lmend n waya dɣa, nenced yiwen seg yimḍebbren n teẓrigin akken ad nwali tasedmirt-is tamenzut ɣef usenfar d wayen i ten-ideggren s waṭas ɣur-s. « Zemreɣ ad d-iniɣ ayen i aɣ-yeǧǧan ad nger deg usenfar-a, d ayen njerreb d lmeḥna deg umaḍal n usiẓreg n udlis. Ihi nebɣa ad nɛiwen imura-nneɣ deg usiweḍ n wayen ttarun i yimeɣriyin.Ta d tamezwarut. Syinna, iban nesɛa iswi ad nexdem ɣef yidles aqbayli. Ɣef waya i tt-negzem di rray belli amur ameqqran akk n wayen ara d-nessufuɣ, ad yili s teqbaylit ». D awal n Mbarek Gamar, send ad d-yuɣal ɣer wuguren i d-mlalen deg ubrid netta akk Massa Seddiri ukud yecrek tiẓrigin. « Lemmer mačči d lebɣi akked tebɣest i nesɛa, tili ahaqel acḥal-aya segmi nuɣal ɣer deffir. Aṭas n yiɛewwiqen i d-nemmuger seg yakk tamiwin. Ula d tasekkirt (procédure) xedmen-tt meqlubi! Acḥal i nuzzel ɣer da d din, acḥal i nesber d ayyuren, maca ɣer taggara newweḍ lebɣi ». Di lawan ideg yella s tidet wugur n usiẓreg s tutlayt n Mulud At Mɛemmer, a-t-an yennerna-d uxxam ara d-yawin tafat-is i yimura ilemẓiyen, ara yerren azal ugar i yidles azwaw d umaziɣ s umata. Ad d-nerr awellih d akken ur sɛint teẓrigin-a xilla segmi d-wwint tasiregt seg uɣlif, ma d beddu n uqeddic yettwasihel i yennayer-a i d-iteddun n 2018. Teɣzi n tudert i teẓrigin-a.
M. K.