Accueil Tamazight Isefra n tafrara n Kader Meddour

Ajdid deg tmedyazt : Isefra n tafrara n Kader Meddour

737
- PUBLICITÉ -

Isefra n tafrara d ammud n yisefra wis sin i d-yessezreg Kader Meddou ussan-agi iɛeddan. Isefra i yessekles s uẓawan daxel n uḍebsi CD anda i d-yefka tamuɣli-s s tmedyazt ɣef wayen iḍerrun deg tmetti. S yiḥulfan n umdan akked tebɣest n umeɣnas, yebɣa ad yernu aẓru-is i teɣremt, i unegmu n yidles d tulatayt, netta yellan yakan d aselmad n tefrensist. Dɣa, s tzemmar-agi n tutlayt tafransist i yettarra isefra i ixeddem s teqbaylit ɣer trumit. Am wakken i yerra, diɣ, ugar n 300 n yinzal i d-yemger ɣer temɣarin ɣer tutlayt-agi n Molière. Am wakken i d-yessuqel, daɣen, ugar n 150 n tneqqisin n Jean de La Fontaine ɣer tmaziɣt. Kader meddour, i d-yessuffɣen yakan ammud amezwaru n yisefra iwumi yefka azwel ‘’Tayerza s wallen’’, yefka aṭas deg-sen i icennayen imaynuten. Ɣur-s, ayen akka ixeddem yettuneḥsab d aseḥbiber ɣef tgemmi, imi ayen i d-yegmer ɣer temɣarin d lemri n tura akked uzekka. D leḥmala-agi n tgemmi i t-yeǧǧan akken yeqqar ‘’Taddart tettak-it i tayeḍ i wakken ad yemlil akked yimɣaren uɣur mazal idles d tutlayt’’. Ayen i d-yelmed ɣer tgejda-agi tiqbayliyin, terra-t d timsirin n ddunit deg yisefra-s iwumi yerna sser n uẓawan aḥlawan i yessishilen ciṭ asegzi n wayen i d-yeqqsed umedyaz. Ayen i d-yeqsed d akken amedyaz ilaq ad yili d amedya i tmetti, d netta ara tt-yettwellihen, ladɣa imi Kader Meddour yella d aselmad n tefransist. Ilul deg useggas 1955 deg taddart n Ait Daoud, taɣiwant n Yatafène. Yebda yettaru tamedyazt mi yella d amecṭuḥ, asmi yesɛa 11 n yiseggasen. Seg yimir ar tura, mazal-it yettkemmil deg unnar-agi n tmedyazt. Aṭas n leqdicat-nniḍen i ixeddem daɣen i useḥbiber ɣef tgemmi akked usnerni n yidles amaziɣ s umata. Yettekki deg usmekti n tmettant n Mohia i d-yeḍran deg ussan-agi iɛeddan, 6 d 7 deg duǧember-agi deg-i i nella s kra n yisefra i yexdem ɣef Mohia.Am wakken yettili, yal tikkelt, s yisefra-s mi ara tuɣal tejmilt i urgaz n ccna neɣ yidles.

- PUBLICITÉ -

Hocine Moula

- PUBLICITÉ -