D ayen ara d-yawin aṭas n urṭaḥ i yimezdaɣ n Ayt Smaɛel d wid n taddart n Rrif deg useggas amaynut ara d-ikecmen. Mbeɛd teɣzi n uraǧu d uleqqem n yal ssenf d awal sɣur kra n tamiwin, ha-t-an ur yettɛeṭṭil, ad yebdu usenfar n ujbad n waman seg Lɛenser Azegza. Dɣa, deg yiwet n tiɣri n tikci n usenfar-a iɣef nettmeslay, i d-tessufeɣ Tenmehla n teɣbula n waman, tesseḥres tneggarut-a ɣef tkebbaniyin ara isersen ikaramen, d akken ilaq ad ilint d tid yesɛan tizemmar tigejdanin d ttawilat i tuṭṭfa n uqeddic-a. Ma d tafada taneggarut i tuṭṭfa tettuɛeyyen-d i 19 deg wayyur-a n duǧember. « Mi ara d-tbin tkebbanit i yesɛan tizemmar ilaqen ad ṭṭfent asenfar-a, ad d-teqqim kan tezrawt tamecṭuḥt ɣef tarrayt ara yettwaddmen i usemres n uqeddic deg unnar. Syinna, ahat yewwi-d sin neɣ kraḍ n wayyuren, ad bdun lecɣal ». D awal n uselway n tɣiwant n Ayt Smaɛel, Mass Sadeq Rebbaɛi. Seg tama n yimezdaɣ, yezger ɣef wulawen-nsen ubeḥri n tumert, ulamma ḥsan d akken ad d-yuɣal uxelles n waman asmi ara kfun yiqeddicen n usiweḍ. Awi-d ukan mi asen-d-iban d aman yezdigen n teɣbalut ara ččarayen, mačči n ubaraj am wakken ɣillen kra n yiɣermanen. « Ma yewwi-d ad nxelles, ad nxelles. Xersum ur nseɛɛu aɣilif n lexsas, rnu ad tili teɣdemt deg waya ». Akka i d-tenna yiwet n tmeṭṭut seg Ayt Smaɛel.
M. K.