Par DDK | 11 Janvier 2018 | 1139 lecture(s)

Tubiret

Asfugel n Yennayer

Yennayer d awal uddis ; yen (yiwen) ayer (aggur) anamek-is « aggur amezwaru » n useggas γef leḥsab n wussan n tfellaḥt.

Melmi i yebda leḥsab-is ɣef wakken i d-nnan kra ?

Ayen yeǧǧan Imaziγen ad bdun leḥsab-nsen, d tadyant yeḍran gar ugellid-nsen « Cacnaq » d win n yiferɛunen « Ramses II » 950 n yiseggasen send talalit n sidna Ɛisa, asmi akken i d-gren yimaziγen n Maser tiγri i Cacnaq γef tmuḥqranit i yesɛedday fell-asen Ramses II. Yella-d ṭrad gar-asen, yesseγḍel-it Cacnaq, dγa yesbedd tagelda tis 22 deg temdint « Tanis », tamdint n « Delta du Nil » (San El Hadjer tura) deg Maser. Yerna yessaweḍ yessemlal tama n ufella d tin n wadda. Amager n yennayer , deg tefriqt n ugafa, yettemgarad seg temnaḍt γer tayeḍ. S umata, yettili-d s ubeddel n yimensi uγur d-ttnejmaɛen yakk yiweggalen n twacult, deg tuget, d seksu s lmerqa m sebɛa n yisufar ; aya dγa i wakken ad yaγ lxir deg tmurt d uyaziḍ imi aneggaru-a d azamul n tafrara (iṭij), xeddmen tasewwiqt tamezwarut i uqcic ideg ara d-yaɣ aqerru n uzger i wakken ad yili d aqerru n uxxam. Icawiyen, ttbeddilent tlawin inyen, ssizdigent ixxamen yerna ttlusunt talaba tamaynut. Aya yakk d asfillet i useggas n rbeḥ d lγella. Asfugel n yennayer, ad yerzu amdan ɣer umezruy-is d yidles-is i wakken ad yeṭṭef deg-sen, ad yesseḥbiber fell-asen anda yebɣu yili imi win ur neẓri ansi i d-yekka, ur yeẓri sanda i iteddu. Aseggas-a, yennayer yemmuger-it ugdud azzayri s umata d yimezdaɣ n Tubiret beddemma s yiwen n wudem tamaynut imi amenzu n useggas yuɣal s wudem unṣib d lficṭa. Ama d tidukkliwin tidelsanin, tid n waddal, tisquma n tuddar, beggsent i merra i wakken ad sfuglent s yennayer. Ma nezwar-d s tenmehla n usegmi, i merra iɣerbazen qeddcen, ttheggin i tmeɣra-a, i wakken ad naf tajmaɛt n tdukkliwin n Yimceddalen i d-iheyyan yiwen n wahil d amerkanti. Deg tama n Beclul, d taddart n M’laoua ara yilin deg ttiɛad i wakken ad d-tessewjed yiwet n tmeɣṛa i wass n lǧemɛa anda ara yilin waṭas n yimdanen ara icebbḥen taddart, am wakken yetturaju ad ḥeḍren ula d yimḍebbren n Tubiret. Ɣef waya, d Tubiret ara yilin di ttiɛad i merra i usfugel n Yennayer.

M. Smail

0