Aḥric1
Ibedd Yennayer i usawen-ihi deg yigenni, yeṭṭalay-d d agessar, γur-s d ass yifen ussan: Tineqqlin, γlin-asent wafriwen-nsent. Aḍu, yettsuḍ-d s tezmert-is, lgerra ugeffur, tessebzeg akk ddunit. Ma d Mass Iṭij, yessules wudem-is, yebγa ad yeṭṭes ugeswaḥ. Yefṛeḥ, Dadda Yennayer, yekmumes deg yiwen usigna d abelbul d azuran, yettheyyi iman-is, ad yexxuc nnig yixxamen…Dγa mi yeṭṭes Dadda Yennayer, teẓrim amek: ṛṛεud-is ur ttağğan yiwen ad yeṭṭes tanafa, wannag ticki i ijexxeṛ, asxerxer-ines, yessagad ula d ilfan, wannag tura, aman…anda yufa. Ihi akka, Yennayer ad yeṭṭes, ad d-yernu γur-s mmi-s, Furar, Meγres-nsen ad d-iγerres ula d netta ticki i d-tewweḍ nnuba-s, nutni di kraḍ, ttarran ddunit am wakken nnsen kan. Tessun-tt akken i asen-yehwa, ssiriden-tt ticki i asen-yehwa, ssismiḍen-tt akken i asen-yehwa. Ẓara, yiwen wass, deg tlemmast n waggur n yennayer, telsa tabernust-is, terna tarkasin-is, tesbur taqelmunt, teγra i yemma-s:” a ye… ad ffγeγ ɣer tmazirt. « -Uh a yelli, ur yelli d ass n tuffγa ɣer tmazirt wagi! Aḍu, asemmiḍ, ageffur, agris…Ddem-d taεelğett-inem ad turareḍ, neγ ax imru ad tesxerbubceḍ γef lkaγeḍ, neγ yya ad am-d-iniγ tamacahut ». Terra-as-d: « aha, aha, bγiγ ad ffγeγ ad urareγ deg berra, ad azzle&gamma,; ad iẓifeγ… ». Tenna-as yemma-s : « Ulamek a yelli, deg tmazirt d aluḍ, ageffur, a-t-an wwet ma ad tewteḍ…. ». « Acuγer a yemma akkit annect-a? » i as-tenna Ẓara. Tenna-as yemma-s : « Acku d tagrest a yelli, d yennayer ». Deg berra, d tidet, d tallast talellast, ma tmuqleḍ taleṭṭat-ik ur tt-tettwaliḍ ara. Adebbuz ahat ad t-twaliḍ, acku zur. Alemmas gar-asen γezzif. Ameccaḥ teṛbuyin, alma tuẓaḍ ɣer γur-s neγ yuẓa-d ɣer γur-k, wannag meẓẓi meẓẓi meskin ad tγileḍ ulac-it maḍi…meskin…
Yettkemmil
Tettwakkes-d seg Imyura.net